Rubén Lorenzo, PP de Carballo: «O único voto de cambio útil en Carballo é o voto para o PP»

Aínda que xa é dende hai tempo a cabeza visible do PP de Carballo e edil dende o 2019, Rubén Lorenzo, tamén deputado autonómico, encabezará por vez primeira a lista popular nunhas eleccións, este 28 de maio. Técnico en Comercio e Márketing, é do 1982.

—Como marcha a campaña?

—Ben, intensa, pero ilusionante, traballando duro, tanto eu como o meu equipo, ao que lle agradezo o esforzo. Traballamos para ser a alternativa do goberno, para acadar ese cambio que Carballo precisa.

—Ese é o obxectivo?

—O obxectivo é claro: gobernar Carballo. Somos a única alternativa ao goberno actual. O único voto de cambio útil é o voto que vaia ao PP, todo o que non sexa votar ao PP acabará beneficiando á continuidade do señor Ferrero.

—Seis partidos en liza, e iso que se caeu TeGa. Como pode influir?

—Ante todo saúdar a todos os candidatos e á candidata, Maricarmen Vila, desexando que o que resta sexa unha campaña de respecto, fuxindo desa política que calquera cidadán rexeita agora, a da confrontación. É un síntoma de saúde democrática que calquera partido que estea en disposición de presentar unha lista o faga. Que haxa cinco partidos a maiores do noso beneficia ás posibilidades que se lle dan á veciñanza para escoller, pero insisto en que o único voto para o cambio será o do PP. Entran en xogo eses dous concelleiros de TeGa e estamos intentando convencer a eses votantes para que aposten polo cambio.

—Cal é o balance do feito polo goberno do BNG nestes catro anos?

—Foi un mandato marcado pola pandemia. A pesar do respecto institucional que tivemos durante todo ese proceso, agora xa se pode facer balance e entendemos que o goberno non estivo á altura. Prestábase atención de axuda no fogar sen os medios necesarios de protección. Puídose facer moito máis, pero non deixa de ser un síntoma dun goberno ao que a pandemia o que fixo foi dárlle máis pulo a esa inercia, apatía e inacción na que leva instalado dende que goberna en solitario o señor Ferrero. Carballo vai a menos e está perdendo día a día oportunidades. Foi un mandato máis de promesas incumplidas, como o edificio de entidades sociais ou un novo auditorio. Non se fixo nada nin sequera para reformar o Pazo, unha das grandes obras que se fixeron en Carballo no anterior mandato do PP.

—Que destaca do seu programa?

—É un programa amplo, pensando no Carballo do futuro, un novo Carballo é posible. Temos proxectos a curto, medio e longo prazo. Un proxecto para servir ás persoas: conciliación, educación, politicas sociais, deporte, saúde... Queremos xestionar o noso concello con eficacia, xerando oportunidades, poñendo o emprego no centro, e co desenvolvemento turístico e industrial da nosa zona, apostando polo rural. As parroquias deben ter as mesmas oportunidades. Apostamos por un proxecto que una as sinerxías, coa igualdade e a inclusión como obxectivos transversais, eliminando barreiras arquitectónicas e coa cultura como elemento de cohesión. Un novo plan de mobilidade e humanización que acabe co laberinto no que se converteu a vila e que facilite a vida, abrindo as vías estruturantes previstas no PXOM dende o 2016.

---

---

---