Tanxugueiras en Carballo: corazóns quentiños e cabezas molladas

Marta López CARBALLO / LA VOZ

CARBALLO MUNICIPIO

BASILIO BELLO

Crónica | As pandereteiras deron un dos concertos máis exitosos dos últimos anos no San Xoán carballés

26 jun 2022 . Actualizado a las 05:00 h.

O deste ano foi un patrón pasado por auga. Carballo agardaba con ansia estas datas, mais desta volta non foi o covid, senón a chuvia, a que acabou deslucindo unha das xornadas centrais da semana grande de festexos. Mollada foi a tarde, pero non así a noite. Polo menos, non tanto como o día. Estaban as Tanxugueiras en plena faena cando o ceo descargou apenas as últimas pingueiras, un orballo fino, pero suficiente para que boa parte do público despregase os paraugas. «Somos xente do norte, temos que estar habituados á chuvia», dicía Aida Tarrío dende o palco, animando a baixar os paraugas para que o público situado na parte traseira da praza tamén puidese gozar do espectáculo.

Regístrate gratis y recibe cada mañana en tu correo las principales noticias del día

Porque espectáculo houbo, e abondo. Pasaban escasos cinco minutos das once da noite cando soaron os primeiros acordes e entraron as tres pandereteiras en escena. Non cantando, senón bailando, como veñen facendo durante esta xira Midas. Desidia, un dos seus últimos lanzamentos, soou nada máis comezar a actuación, que numerosos pícaros puideron ver en primeira fila ao permitírselles colocarse diante das barreiras perimetrais.

View this post on Instagram

A post shared by Concello de Carballo (@carballomola)

Ante unha praza chea, Aida, Sabela e Olalla demostraron con soltura os motivos polos que son o grupo do momento. Con potentes alegatos en prol da música tradicional e do galego, continuaron co seu repertorio, mesturando cancións de traballos anteriores con temas que introducirán no seu novo disco, que verá a luz o vindeiro 29 de xullo. Non faltaron as referencias ao San Xoán, mais Aida Tarrío convidaba a non escorrentar a tódalas meigas, «porque algunhas son boas». Foi xusto antes de interpretar o seu ultimísimo lanzamento, Seghadoras. Pese a ser publicado apenas horas antes, os presentes demostraron fidelidade e acompañaron ás pandereteiras na letra. «Como molades, Carballo, sodes un público que te cagas!», concluíu Tarrío dende o escenario.

View this post on Instagram

A post shared by T A N X U G U E I R A S (@tanxugueiras)

«Pano corado», unha dedicatoria moi especial «a tódolos homófobos»

Pasado o ecuador da actuación chegou a parte máis tradicional do concerto. «Somos pandereteiras e morreremos séndoo», dixo Olalla Maneiro, antes de ofrecer aos asistentes «o corazón das Tanxugueiras, tratádeo ben!». Temas como Albedrío, Perfidia, Malquerenza ou Desposorio soaron a continuación, cun alarde de virtuosismo vocal e un impecable son que conseguiu que as harmonías das Tanxugueiras se escoitasen dende calquera punto da praza carballesa.

Chegou Pano Corado, ese cántico ao amor libre que Sabela Maneiro dedicou a «tódolos homófonos do mundo». Moi aplaudida foi a súa reivindicación, mais non foi a única, porque boa parte dos temas que este trío de pandereteiras vén lanzando ultimamente están repletos de mensaxes. Cantáronlle á diversidade sexual, ao corpo da muller, aos coidados, ás envexas e, por suposto, á patria.

Carballo vibrou cunha intensa sucesión dos seus máis recentes e experimentais éxitos, como Figa ou Midas, e, para rematar, Terra. Non podía faltar ese tema que toda Galicia anhelaba escoitar en Eurovisión. Cun sarcástico «Thank you Europe!» se despediron as Tanxugueiras, que marcharon de Carballo «co corazón ben quentiño».

Aida Tarrío e as irmás Olaia e Sabela Maneiro

Aida Tarrío, das Tanxugueiras: «Sentímonos moi queridas en Carballo e na Costa da Morte»

Marta López

A ribeirense Aida Tarrío (1997) integra, xunto coas irmás Olaia e Sabela Maneiro, o trío Tanxugueiras, que encabeza a programación musical do San Xoán este ano. Actuarán mañá, a partir das once da noite, na Praza do Concello.

—Volvedes á capital de Bergantiños, a onde xa sodes asiduas.

—Estivemos hai pouquiño co Carballo Interplay e o ano pasado, no Orballo Cultural. Recordo que foi un día de bastante calor e aínda había restricións, así que tiña que estar todo o mundo sentado. Aínda así, a xente estaba a tope, así que o concerto deste venres en Carballo ten que ser a festa do ano! Estamos namoradas de toda Galicia e sentímonos moi queridas na Costa da Morte. E nós tamén vos queremos a vos, claro! Cando pasou o de Vimianzo, que non puidemos montar o palco polo vento e tivemos que retrasar o concerto un día, a xente entendeuno moi ben e demostráronnos moito cariño.

Seguir leyendo