Rubén Lorenzo: «Pola pandemia, nós fomos responsables, sen facer unha política de desgaste»

Nestes tres anos cambioulle moito a vida a Rubén Lorenzo (1982). Nas listas do 2019 ía de número 5 e entrou na corporación polas renuncias do primeiro e da terceira. Un ano máis tarde foi elixido deputado autonómico, e dende esta primavera tamén é o portavoz municipal. Di que este mandato foi «raro», porque a pandemia incluíu en todo, pero tamén o propio partido viuse nun proceso interno de reconstrución.

—Vostede que balance fai?

—A pandemia marcouno todo. E debido a ela, nós fomos responsables, deixando traballar ao goberno, sen facer unha política de desgaste pola situación complicada na que estabamos. Non quixemos confrontación, si arrimar o ombreiro.

—E?

—Pois botamos en falta unha actitude de estar máis presente pola súa parte, de actuar, de non deixarse levar como fixeron. Estiveron máis á espera do que facía o Goberno central ou a Xunta, sobre todo. Creo que o Concello de Carballo non estivo á altura da situación tan complexa na que estabamos.

—En principio, xa estamos saíndo dela.

—Parece que xa se pode dar por finalizada, xa se poden ir facendo cousas neste ano, pero o BNG non ten folla de ruta para actuar en Carballo. Non teñen isto, pero tampouco toleran as críticas, nin fan autocrítica.

—Que lles pide?

—Menos bombo e publicidade, e máis xestión. A Carballo faille falta un programa de actuacións claro a medio e longo prazo. É unha cidade de comercio, unha referencia como cabeza de comarca, pero estase perdendo todo iso por non actuar. O proxecto de Evencio Ferrero e do BNG está esgotado, e os cidadáns ben o ven.

—Vai ser vostede o candidato no 2023?

—Non o sei, dependerá do que decida o partido. Eu traballo como se o fose, non hai tempo que perder, pero eu non son o que decide iso. Nin en Carballo, nin noutros lugares. A día de hoxe, nin sequera se coñece quen vai ser nas grandes cidades. O partido traballa niso, pero todo ten os seus tempos.

—Non decide só o partido, tamén vostede no caso de que, como parece probable, si que llo propoñan. E daquela?

—Se ocorre iso, e o partido así o decidise, para min sería un orgullo, claro.

—Falando de partido, presentaron non hai moito a nova executiva local. En que fase están agora?

—Traballando en dúas liñas. Unha, na das eleccións do ano que vén. Preparando o proxecto, escoitando a voz da experiencia, recabando ideas, asesoramento... Recollendo aportacións de todos cantos aportan. E a outra, o equipo. Facendo equipo. Sumando o maior número posible de persoas e de perfiles, con veteranía e con renovación, e cunha nova estrutura.

---

---

---