Pumar Gándara, o cura admirador de Valle-Inclán que doa a súa biblioteca polo ben común
CARBALLO MUNICIPIO
Instalada no despacho parroquial de Carballo, será inaugurada o vindeiro luns nun acto aberto
11 may 2022 . Actualizado a las 05:00 h.
Entre a vastísima oferta de actividades que nos vindeiros días se celebrarán na Costa da Morte co gallo do Día das Letras Galegas figura a inauguración dunha biblioteca ben especial nas dependencias parroquiais de Carballo. Alí instalados están os libros que o sacerdote Xosé Pumar Gándara foi atesourando ao longo da súa vida e que agora, «soprepasados xa os 90 anos», decidiu doar á comunidade como unha maneira de agradecer a acollida brindada hai 25 anos. A idea, di, é que agora sirvan a outros do mesmo xeito que lle serviron a el durante tantos anos.
Na colección que doou, e que o arcebispo aceptou «con agrado», asegura, hai moita obra teolóxica, pero tamén literatura histórica sobre Galicia, o Xacobeo ou a catedral compostelá, entre outras temáticas. Como lector, goza tanto dos autores clásicos como de novos escritores que «están hoxe na fronte abrindo camiño», asegura. Para el, José Guerra Campos ou Antonio López Ferreiro son nomes imprescindibles, así como Valle-Inclán, cuxo «castelán galeguizado» di admirar especialmente. A nivel local destaca o traballo do seu bo amigo Fernando Cabeza Quiles, «que nos ensina a gran historia que atesoura a toponimia».
A Pumar Gándara, lector acérrimo e firme defensor do galego, gústalle tamén manterse informado. Confesa que conserva «moitísimos recortes da Voz de Galicia», incluído un moi especial no que se recolle aquela tan importante homenaxe a Rosalía que promoveu hai máis de cincuenta anos. «Hai que fomentar a lectura», di, «é algo que se nota moitísimo na linguaxe que empregan as persoas. A televisión énchenos a cabeza de linguaxe inglesa, facendo que se perda a nosa fraseoloxía, as nosas palabras, o noso idioma...», di o sacerdote, que pese á súa avanzada idade aínda colabora estreitamente co párroco carballés José García Gondar.
Insiste Pumar na importancia da lectura á hora de formar un pensamento crítico e facer fronte «ás ideas que nos intentan impoñer». Agradecido pola acollida que a capital de Bergantiños lle brindou hai 25 anos, cando xa tomara a determinación de retirarse, quere agora ofrecer coa súa biblioteca persoal «un servizo máis» á parroquia. «Para valorar Galicia, nós mesmos. Esta inauguración entra de cheo no afán da parroquia de colaborar na formación integral da freguesía», afirma o veterano cura.
Dita presentación está programada para o vindeiro luns, día 16, ás oito e media da tarde. Non estará só, pois acompañarano dous vellos coñecidos aos que confesa gardar especial cariño. Un deles é o coristanqués Xosé Antonio Andrade, de quen di admirar tanto os seus textos actuais como aquelas «cartas admirables que escribía de mozo». Tamén estará Xosé Manuel Varela, a quen agradece o «gran labor» desempeñado no Instituto de Estudos Bergantiñáns, así como o párroco José García Gondar. Tras compartir, todos xuntos, un momento de tertulia, procederase á bendición da biblioteca, instalada nos locais do despacho parroquial.
O acto será aberto ao público e Pumar despídese estendendo un convite a fregueses e, en xeral, persoas interesadas neste novo contido que a partir de agora estará dispoñible na parroquia carballesa. «Será un momento de celebración e festexo», di.