Lemos: «Ninguén asegura que se non cambia o equipo, non teña que saír eu tamén»

O novo adestrador do Bergantiños sincérase sobre a súa chegada ao club carballés tras o cese de Borja Facal


Carballo / La Voz

A chegada de José Luís Lemos Ameneiro (Santiago, 1970) ó banquiño do Bergantiños non se produciu, quizais, no mellor momento, tras a saída repentina dun home da casa como era o laxense Borja Facal. El mesmo é consciente da situación, non só a nivel de clasificación na Terceira galega, senón tamén de ánimos no vestiario e nas gradas. Con todo, veu por un motivo, para tratar de mellorar o rendemento do equipo, e nesas tarefas se centra.

-Como chegou ao Bergantiños?

-Tiven dúas opcións de chegar. A primeira, co cese de Miguel Figueira. Chamáronme do club, preguntáronme pola miña dispoñibilidade, e tamén me comunicaron que había outra opción dun home da casa. Despois do Bergantiños xogar en Pontellas o domingo día 5 deste mes, volvéronme chamar para dicirme que querían falar comigo porque ía haber un cambio de adestrador despois de disputar o partido contra o Choco, pasara o que pasara. Esa semana tivemos varias conversas, e o mércores, en Carballo, chegamos a un acordo. Era unha cousa que só sabiamos a directiva mais eu. Pensaban que era apropiado que Borja estivera no último partido e que, se saía ben, como foi o caso, pois que tamén saíra cunha vitoria.

-Foi unha sorpresa para xogadores e afección, pois non é o máis habitual que tras un triunfo chegue unha destitución.

-Eu entendo que pode chocar máis, pero repito, a decisión estaba tomada de antes. Entendo que poida sorprender a algún xogador, como sacastes na prensa a Christopher e co que falei no primeiro adestramento, pero ao final hai que acatar as decisións do club, tanto cando nos benefician como cando non.

-Que ambiente hai agora mesmo no vestiario?

-De principio, para todos era de sorpresa, porque unha cousa é cando se toma a decisión, e outra, cando se comunica. E nese intervalo de tempo, hai unha vitoria. Entón, pois chama moito máis a atención. Eu expliqueilles isto mesmo que vos estou contando aquí, de como fora o proceso de chegar a ser adestrador do Bergantiños. Na decisión da directiva, eu non podo influír, pois comunícanme que vai ser o domingo si ou si e así llelo expliquei. E que había que librar e seguir para diante e nada máis.

-Como se reconduce unha situación como esta?

-Non chego no mellor dos momentos. Tamén é certo que se o Bergan fose moi ben, seguiría Miguel ou Borja. E ninguén asegura que se non cambia e mellora o equipo, non teña que saír eu tamén. Isto é o fútbol. Pero bueno, é un reto nun club que todos coñecemos, sobre todo os que estamos neste nivel en Galicia. Sabemos que é unha entidade seria, estruturada, na que apetece ir traballar, pero que chega nun momento complicado e que é importante saír de aí canto antes, para non verte sobre todo na recta final da liga involucrado neses postos de descenso onde xa todo é moito máis complicado.

-Está ao tanto de todas as fichaxes e saídas que houbo. Todos estes cambios son do seu agrado?

-Tiven pouco que ver neles, pois se comento que o primeiro contacto que tiven coa directiva foi o día 5 de xaneiro e que ata o mércores non me reúno con eles, pois antes só foron conversas telefónicas, e as novas incorporacións son presentadas esa mesma semana... Coñezo a Cabanillas e a Vela. A Álex, non. Os dous primeiros son futbolistas de bo nivel para este plantel, e ao ucraíno haberá que velo co tempo. Xa estaban feitos e hai que adaptarse ó que hai.

-O domingo chega un novo encontro na casa contra outro rival importante: o Ourense CF, segundo clasificado. Tras a vitoria do último día, debería haber ánimos para afrontalo, non?

-Non é que poida habelos, senón que ten que habelos. O equipo fixo un bo traballo o domingo e, Borja, tamén. Foron capaces de sumar tres puntos contra un equipo que está en moi boa forma e que é moi complicado porque ten moita calidade manexando o balón. Fixeron un gran desgaste para defenderse ben, e eses tres puntos son importantísimos. Eu mesmo comentei no vestiario que, das posibilidades que se podían dar o domingo para a miña chegada, e sabendo que ía ser máis difícil de explicar habendo unha vitoria, prefería por suposto que o equipo gañara e tivese tres puntos máis. Agora, toca un partido máis na casa, contra un rival que está moi en forma e facendo unha moi boa tempada. Respectarémolo, por suposto, pero non imos temelo para nada. Temos que ir a polos tres puntos porque volver sumar outros tres sería importantísimo para seguir dando pasos para saír de aí abaixo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Lemos: «Ninguén asegura que se non cambia o equipo, non teña que saír eu tamén»