Xa tocaba outra regueifa,
a graza non che é moita,
que se anegan as aldeas
nesta semana de choiva.
Que maneira de chover,
hai tempo que non se ve,
traballaron os bombeiros
de Carballo ata Cee.
Eu xa pedín en consulta,
que a cousa está ben sabela,
se había algún barquiño
para chegar a Compostela.
Polo menos se vos chove,
levade paraugas na man,
que aló en Cataluña
o que lles chove son paus.
É o tema da semana,
non lle vou a quitar graza,
creo que hai moita tristura
por falta de democracia.
O que si que teño claro,
por dicilo de bos modos,
non é só de cataláns,
tamén é cousa de todos.
Porque penso que esa xente,
en tanta barbaridade,
quere falar libremente
e ter máis tranquilidade.
Por aquí iso non pasa
que durmimos ben ó quente,
aínda nos veu visitar
o que é o noso presidente.
Veu Feijoo ata Carballo,
non sucede a diario,
podía vir ata a feira
pero foi cos empresarios.
Que vaia cos empresarios,
iso non vai ser tan raro,
polo menos, se falaron,
que quitaran algo en claro.
Que teñades bo domingo,
con un caldiño de unto,
seguiremos informando
do que pasa neste mundo.