Máis mensaxes para os pasos de peóns de Carballo: volve «Ruar e Rir»

A segunda edición desta iniciativa, impulsada arredor das Letras Galegas, adquire un novo significado e fins pedagóxicos


Carballo / La Voz

Volve a Carballo «Ruar e Rir». Esta iniciativa impulsada no 2015 polo Concello de Carballo para darlle vida aos pasos de peóns da vila con frases filosóficas que suscitan reflexións, preguntas e levan a tomar a cidade como parte das vivencias dun, adquire agora un novo significado. Vén de presentarse a segunda edición con motivo das Letras Galegas e con marcado fin pedagóxico, tal e como indican: pintaranse 18 frases en distintos puntos, como os accesos aos institutos Monte Neme e Alfredo Brañas, e que son o resultado dun proceso creativo nos que participaron alumnos de segundo de bacharelato destes dous centros.

En cada un dos centros colaboradores, baixo a coordinación do sociólogo Santi Pazos, tamén alma máter da edición de hai catro anos, traballouse coa supervisión das profesores de Lingua Galega. Así, ata ir chegando pouco a pouco ás oracións definitivas que eles mesmos pintarán, unha actividade que xa botaron a andar onte.

Entre as elixidas, algunha como a que subtitula este «Ruar e Rir 2»: As esencias da cidade lévalas dentro dos zapatos. Outros exemplos: Precaución, aquí aprendemos a pensar; Polos cóbados respira o coñecemento ou A lectura é o atallo para a cultura.

Son arredor de 60 nomes os que están detrás deste proxecto colectivo que pretende ser unha homenaxe viva á lingua galega a través das verbas nos pasos de peóns. É por iso que as pintadas (hoxe, 10.00, paredes do IES Monte Neme) se levan a cabo en horario lectivo, antes do 17, e con artistas como Cristina Castro, María Marticorena, Santi Picos ou Mon Lendoiro. Lingua, vocabulario, ortografía, gramática e imaxinación son aspectos tocados polos rapaces ao longo da concepción desta nova edición da iniciativa.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Máis mensaxes para os pasos de peóns de Carballo: volve «Ruar e Rir»