«O Premio da Cultura Galega ao FIOT é un ánimo para poder seguir»

Presidente da asociación Telón e Aparte, Alberto Sueiro recollerá esta tarde o galardón en Montederramo. Non estará só


Carballo / La Voz

Os carballeses están de noraboa. O FIOT, o Festival Internacional Outono de Teatro, ten sido galardoado co Premio da Cultura Galega na categoría de artes escénicas, e hoxe é o día para a recollida do premio, un acto que terá lugar ás 12.00 no Mosteiro de Santa María de Montederramo, e no que tomará parte Alberto Sueiro, presidente de Telón e Aparte, entidade organizadora do festival. Non estará só. 

-Un recoñecemento deste tipo non está nada mal.

-Non, non, ao contrario. Está extraordinariamente ben. Para nós recibir o Premio da Cultura Galega no ámbito das artes escénicas é unha honra que nos enche de alegría. Ninguén traballa pensando nos premios, pero tampouco a ninguén lle disgusta un recoñecemento así, e máis sendo como é a nivel galego. Levamos xa 27 edicións celebradas e nós estamos xa na 28 [traballando].

-Haberá quen pense que chega tarde, pero en todo caso é un premio a un labor do que xa temos falado, nada doado.

-Non, non o é, pero tampouco creo que chegue tarde. Hai moitísimas iniciativas e moitísimas persoas que merecen un recoñecemento polo traballo feito, nos distintos ámbitos da cultura galega. Para nós, penso, chega en tempo, e estamos agradecidísimos. Non é doado no sentido de que, en todas as iniciativas, o máis difícil é consolidalas. Que isto chegue aos case 30 anos significa un impulso novo e que algo que fixemos estivo ben. É un ánimo para poder seguir adiante, sobrevivindo.

-Do FIOT fala ben o público, as compañías, os actores. Ese premio xa se ten.

-Si, e aínda que un recoñecemento oficial nunca sobre, ao final o que precisas é o aprecio dos que ano a ano facemos isto: compañías, produción, actores e, en definitiva, o do público, que para o final é para o que estamos. Os carballeses e bergantiñáns son os que han de gozar do festival, telo en consideración, e penso que iso si é así. Despois de todos estes anos, cando se achega o FIOT, moita xente está pendente e acude ao teatro. Conseguimos que se puidesen ver obras ás que non se tiña acceso: con iso cumprimos a nosa misión. Que para os carballeses hoxe non sexan alleo Shakespeare, Lope, Calderón, Valle, Cándido Pazó ou Vidal Bolaño.

-Xa é parte do ADN.

-Si, dicía e ten escrito Laurence Olivier que, nunha gran cidade, o signo visible de cultura é que exista teatro. En Carballo, pois, podemos considerar que somos cidade de cultura.

-Que tivo en conta o xurado para valorar con tal atino?

-A proposta está feita en base á traxectoria, ao impulso ás artes escénicas desde unha vila ou un territorio periférico, non convencional para o teatro. Non estamos nunha gran cidade, nin nunha capital e entón o xurado valora todo ese traballo de promoción e difusión das artes escénicas. Non hai que esquecer que o FIOT abrangue desde nenos ata maiores, así como todas as disciplinas e incluso a propia produción ou creación de espectáculos. Estamos moi contentos das que se teñen feito e especialmente das que seguen vivas, como Fillos do sol. Naceu aquí.

-Traballan en algo especial de cara aos 30 anos? É unha desas cifras redondas.

-Si, teñen ese compoñente de número que parece que obrigan a celebrar máis. A nós tanto nos custa unha edición coma outra, e de momento estamos coa 28.ª. Partido a partido [ri].

-Un lugar simbólico para recibir o premio.

-Si, Montederramo, en Ourense. Estase a celebrar a consideración da Ribeira Sacra como Patrimonio Mundial e dalgún xeito o que se pretende dende a Xunta é poñer en valor este fermosísimo espazo natural.

-Quen o acompañará?

-O alcalde de Carballo e o concelleiro de Cultura, así como o persoal do Pazo, ademais de Javier Varela, representante da Rúa dos Contos e do voluntariado. Non estou só porque este é un premio de todos, e sen dúbida eles son parte fundamental do FIOT. Botaremos de menos a Antón Rodríguez Guitoy, outro dos que debería estar, pero as obrigas laborais...

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

«O Premio da Cultura Galega ao FIOT é un ánimo para poder seguir»