«Non renunciamos a nada e imos dálo todo para seguir crecendo»

O seu equipo, o Asesoría Cervantes, enfróntase ao Caldaria na fase de ascenso a Primeira División


Rosalino Mariño Rey (Coristanco, 1959) leva 34 anos ao fronte da sección de voleibol da Agrupación Deportiva Xiria de Carballo. Ao longo deses anos fixo de todo no club: xogador, presidente e adestrador. Agora afrontará mañá un novo reto na súa dilatada traxectoria na entidade: disputar a segunda fase de ascenso a Primeira División Nacional de voleibol feminina.

-O equipo vai xogar mañá contra o mellor equipo da tempada.

-O noso equipo pode dar a gran sorpresa co líder Caldaria Voleyourense. Non será doado, pero co apoio dos afeccionados todo pode ocorrer.

-O actual campión da liga gañoulle sempre ao Xiria.

-É certo. O ano pasado gañounos os dos partidos de liga e a final da fase de ascenso a Primeira División Nacional. E neste curso impúxose nas dúas ocasións. Agora veremos mañá o que somos capaces da facer

-¿Qué posibilidades teñen?

-A realidade é que elas son as claras favoritas. Pero nós esta tempada gañamos na Coruña ao Zalaeta contra prognóstico por 1-3, e no último encontro disputado en Carballo diante do Dompa Xestión para estar en esta fase final. Nesa oportunidade o apoio dos cento cincuenta seareiros nas gradas foi decisivo.

-¿Pode ser esta a arma definitiva do Asesoría Cervantes Xiria?

-Está claro que o equipo está moi motivado e esperamos ese apoio desde a grada. Despois, sobre a cancha pode ocorrer de todo. Nós esperamos saber contrarrestar o poder que ten a Caldaria Voleyourense. Para iso teremos que facer o mellor partido da presente tempada.

-¿Como valora o traballo do adestrador?

-É un gran profesional, como demostrou dende que chegou ao club a tempada pasada despois de acadar o ascenso a Primeira División. O traballo que leva facendo, ca axuda do seu segundo, Cristian Pallas Lorenzo, é inmellorable. Estamos moi contentos con eles.

-¿Teñen baixas para a afrontar a fase de ascenso?

-En principio, salvo por mor do traballo, tanto Asier como Cristian contarán cas doce xogadoras da plantilla: Kely Noya, Lucía González, Ana Vanesa Castro, Jeny García, Sonia Ennes, Patricia González, Bea Souto, Loreto Tarrío, Silvia Rodríguez, Silvia Varela, Paula Rodríguez e a xuvenil Uxía Caamaño.

-O ano pasado a fase final foi en Ourense e mañá será en Carballo.

-Si, este ano animámonos a pedila, por iso a xornada de mañá será completa. Nas semifinais xogarán Zalaeta-Bruxas de Ames ás dez da mañá e despois, no pavillón Vila de Noia, Cladaria Voleyouresne-Asesoría Cervantes Xiria, ás doce. Os que perdan veranse as caras ás 17.00 horas e os gañadores, que disputarán a fase final de ascenso á liga nacional, ás 19.00.

-¿Considera un premio o feito de chegar á final?

-Sen a menor dúbida. Empezamos mal a tempada e o equipo foi a máis para conseguir a clasificación no último partido. Estar onde estamos xa é de por si un premio. Pero non renunciamos a nada e imos a dalo todo para seguir crecendo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

«Non renunciamos a nada e imos dálo todo para seguir crecendo»