Vello mapa


Lembraba a Real Academia Galega que tal día como onte de hai 150 anos falecía Domingo Fontán, o autor da Carta Xeométrica de Galicia, o primeiro gran mapa con rigor científico do país. Xa non é que non se celebren este tipo de efemérides: é que xa case ninguén sabe quen foi este home. E, se nos poñemos estupendos, creo que xa ninguén consulta os mapas, nin os de antes nin o de agora. No móbil, algunha vez, e cando xa non queda máis remedio. Co fermoso e instrutivo que é perderse nas páxinas do Atlas e navegar por elas coa imaxinación, aprendendo os nomes de sitios que non se esquecen na vida. Ou, máis de preto, os do IGN a escala 1:25.000, no que aparecen casa e camiños, regos e alturas.

Antes non era complicado atopar unha reprodución da Carta. Agora, non sei. É grande, pero manexable. Dunha ollada recibes unha lección de historia, comunicacións e toponimia. Unha foto de 1834 (pero impresa no 1845), froito de traballos iniciados no 1917. Os Baños de Carballo xa aparecen moi destacados, moito máis que a pequena aldea do lado chamada Carballo. A vella estrada a Santiago dende esta localidade, que ía por Trazo, e pola Peregrina. A de Santa Comba cara Cícere, Follente, Zas e Vilar. A falta de estradas de Baio cara a costa (Laxe estaba unido a Calo por Traba). A peculiar transcrición da toponimia (Bimianzo, Olbeira, Verdoyas). As Sisargas aparecen cunhas pedras de máis, como illotes. A ampla desembocadura do Xallas ou do Castro. Rebordelos, moi visible na costa de Carballo. A illa da Estrela en Corme, e a do Castelo en Muxía. Estas cousas nunca virán no mellor nin no máis caro dos móbiles.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Vello mapa