«A única limitación do FIOT é o espazo»

O festival teatral carballés convida ao público a combinar a celebración do seu 25 aniversario coas súas efemérides


O presidente da asociación Telón e Aparte, Alberto Sueiro, avanzou en Radio Voz Bergantiños algúns detalles dos preparativos da próxima edición do Festival Internacional Outono de Teatro, unha cita que este ano cumpre o seu 25 aniversario e que convida ao público que teña efemérides semellantes á sumarse á celebración.

-¿Como vai ser este 25 aniversario do FIOT?

-Este ano hai moitas efemérides en torno ao mundo das letras e o teatro (Cervantes, Shakespeare, Cela...) así que nos queremos celebrar aniversarios. Sobre iso vai xirar o festival e as actividades paralelas que haberá durante todo ese tempo, que este ano queremos que sexan mais longo do habitual.

-E piden a participación da xente.

-Si, porque unha das principais características do FIOT -así o recoñecen moitos visitantes e a xente do teatro- é a participación do público. O FIOT é do público e nós o que queremos é facer unha celebración participada por todos, confraternizada por todos. A idea é que todas aquelas persoas, grupos, colectivos que teñan algo que celebrar e que teña que ver con 25 anos se xunten a nós para facelo xuntos: quen cumpra 25 anos, quen leve 25 anos vivindo en Carballo ou quen faga 25 anos que rematou os estudos. Mesmo houbo quen me dixo o outro día: «eu enviuvei hai 25 anos».

-¿Tamén será especial a programación?

-Si. Queriamos facer un ano especial e estámolo intentando. Levamos algún pequeno chasco porque tiñamos algún espectáculo realmente grande e importante apalabrado e con gañas de estar aquí, pero dificultades técnicas impiden que poida ser. Concha Velasco estaba completamente entregada a vir a Carballo, pero desgraciadamente o espectáculo que ten non cabe no noso escenario. Pero o resto que virá será de gran altura e esperamos que efectivamente sexa un FIOT especial.

-¿Vai sendo hora de buscar un novo auditorio?

-O Pazo inaugurouse en outubro do 2002 coa Banda de Carballo, pero a primeira función que se fixo alí foi o FIOT e para nós foi un avance tremendo. Ten unha capacidade razoable; o escenario é un pouco pequeno pero tampouco é unha limitación moi grande salvo en casos especiais. Pero si que é verdade que tendo en conta o tempo que tardan en facerse este tipo de obras e que estamos no ano 2016 é o momento de ir pensando en facelo porque para cando estea listo o Pazo terá xa máis de 20 anos e moito uso. Creo que tranquila e serenamente, pero sen pausa, deberíase estar pensando xa en que Carballo debe en breve ter un auditorio máis grande e en outras condicións. E non só grande en canto a aforo, senón tamén na parte escénica.

-¿Que tal envellece o FIOT?

-Ten unha traxectoria longa e conta cun posicionamento entre os festivais xa non de Galicia senón de España; xa non podemos falar dunha promesa, senón dunha cita consolidada, e agora hai que pensar en darlle unha dimensión nova e distinta para sobrevivir outros 25 anos, pero iso seguramente xa será tarefa de outros. Nós facemos o que sabemos, pero probablemente teña que vir xente que faga cousas distintas e adaptadas aos novos tempos, e que coa experiencia adquirida sexa capaz de facelo máis grande. Para min é unha alegría cando vou por aí e me atopo xente que coñece Carballo polo festival.

-¿Que non se atreveron a facer ata agora?

-Nada. A única limitación que temos é a do espazo. Hamlet, de Kamikaze, que vai ser sen dúbida o gran éxito do 2016, desde o principio reservaron data para vir a Carballo, pero desgraciadamente no noso escenario non cabe o espectáculo e entón non poden vir. Os espectáculos máis grandes contan con vir a Carballo, non nos costa traballo traelos, porque saben que este é un sitio onde hai moi bo público, moita afección, e, tamén é verdade, temos fama de bos pagadores.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

«A única limitación do FIOT é o espazo»