«No meu caso a faceta educativa e a creativa son, no fondo, o mesmo»

A artista carballesa acaba de ler a súa tese e opta a un dos premios Martín Códax


Rosalía Fernández Rial está acostumada a moverse entre distintos mundos que acaban por fundirse nun só. A súa dobre orixe, carballesa e muxiá, foi quen de inspirar unha irmandade artística entre as dúas localidades. E a súa paixón polas artes escénicas e a súa vocación docente lle permitiron alumear unha orixinal tese doutoral -que defendeu con éxito hai poucos días na Facultade de Ciencias da Educación da USC- na que avoga por «unha metodoloxía nova para ensinar linguas que se fundamenta no uso da expresión dramática teatral». O seu paso polo IES Parga Pondal co seu traballo de fin de máster foi o xerme desta tese á que dedicou catro anos da súa vida, pero que non lle restou forzas para canalizar as súas inquietudes artísticas por eidos diversos.

De feito, explica que non existe dicotomía entre a súa formación no eido da docencia e a súa vea creativa: «En realidade é o mesmo; o produto é o mesmo, pero contemplado desde distintos puntos de vista porque se na actividade artística traballo o poético, o literario e a expresión dramática e a linguaxe escénica, no enfoque didáctico fago o mesmo pero dedicado á comunidade educativa. As ferramentas coas que traballo son comúns».

Sen abandonar a poesía, ten transitado tamén cos seus versos e da man do pianista Serxio Moreira por territorios sonoros. O seu proxecto conxunto ELO figura na relación de candidatos dos premios Martín Códax. «Non esperaba estar para nada nunha categoría musical deste tipo. Si que fixen conservatorio, sempre me gustou a música e foi algo importante na miña vida, pero máis a nivel persoal que a nivel profesional. Sempre me centrei no literario, pero é certo que nesa mestura de linguaxes ao final foi confluíndo na musical dun xeito sorprendente».

Proba diso é Catálago, un proxecto expositivo no que comparte espazo con Mon Lendoiro, Chiña e Paco Souto tendendo «pontes» para crear entre os catro «un novo produto nunha dimensión interdisciplinar», é outro exemplo da súa capacidade para aproveitar sinerxías. Os resultados pódense ver no Pazo da Cultura de Carballo desde o día 3 deste mes e para o luns 28 os catro teñen previsto poñer en escena unha performance conxunta.

«Sempre hai que negociar pero iso forma parte da propia vida e da propia existencia. Precisamente nese camiño, nese proceso que se vai tecendo é cando a obra pasa a ser algo conxunto e os puntos de encontro sempre levan a mellora». Nesas andou tamén esta semana coprotagonizando co brasileiro Ricardo Domeneck no centro Ágora coruñés unha nova sesión de Poetas Di(n) versos, o ciclo no que Yolanda Castaño xunta cada mes a un autor galego e outro internacional para atopar puntos de confluencia creativa. Neste caso, «empregar unha linguaxe contemporánea multidisciplinar e traballar a ferramenta poética en relación con outros instrumentos de comunicación, como son as linguaxes escénicas, a vídeo creación, etcétera».

A participación esta fin de semana no congreso de escritores de Cabana, a difusión dun documental sobre a súa tese doutoral e a publicación dalgún novo traballo artístico, «coa perspectiva de seguir avanzando a ver onde nos levan os camiños», son os obxectivos máis inmediatos desta artista que pese a moverse entre dous mundos moi castigados -educación e cultura- afronta o futuro con optimismo. «Hai que tender pontes e buscar puntos de encontro porque supoñen unha mellora para todos e todas. É imprescindible, sobre todo na xuventude, que adoptemos unha postura construtiva, é necesario criticar, pero tamén propoñer alternativas e ter vontade de avanzar. Se nos recreamos sempre no lamento non avanzamos nin construímos».

A autora

Rosalía Fernández Rial. Nacida en Carballo en 1988, presume tamén da súa orixe muxiá. Licenciouse en Filoloxía e acaba de ler a súa tese doutoral sobre Expresión dramática e teatro para a clase de linguas no ensino secundario. Preside a asociación cultural Lumieira.

Obras. É autora dos libros En clave de sol, Átonos, Vinte en escena e Ningún amante sabe conducir e ten participado en media ducia de volumes colectivos. Ademais, xunto co pianista Serxio Moreira, deu forma o proxecto musical ELO.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
6 votos
Comentarios

«No meu caso a faceta educativa e a creativa son, no fondo, o mesmo»