Un día feliz para as librarías e os libreiros

O escritor Manuel Rivas presentou na Biblioteca Rego da Balsa de Carballo «O último día de Terranova»


Carballo / La Voz

Manuel Rivas volveu onte a onde tanto tempo pasou e a onde tanto escribiu: Carballo. Levou á Biblioteca Rego da Balsa a súa novela máis recente, O último día de Terranova. Terranova, toda unha libraría, todo un mundo. «Hoxe é un día feliz para os libros e para as librarías», dixo Evencio Ferrero, alcalde. Na primeira fila, Ramón Tasende, Moncho Tasende, Moncho Brañas, a quen a libraría «xa lle impregnou o nome e a identidade». Un bo exemplo de terranovismo. Díxoo o mesmo Rivas: «Brañas tamén é unha Terranova». «Vimos sempre entusiasmados a Carballo, un referente na cultura do libro en Galicia, un referente indiscutible de dignidade no país»: foron as palabras de Manuel Bragado (Edicións Xerais). Recalcou el tres aspectos: que O último día de Terranova é unha homenaxe ás librarías, aos libros e aos libreiros, sobre todo aos desaparecidos («recoñecendo que o factor humano dálle un valor engadido ao encontro do lector co libro»); que a novela, na forma de mosaico e tamén no eixe cultural, garda unha fonda relación con outra obra de Rivas (Os libros arden mal); e que asemade ten un vencello claro co poemario A boca da terra. Hai palabras compartidas, esferas comúns. A psicoxeografía que ten Manuel Rivas como pouso, as resistencias e as reexistencias, a convivencia do real e do imaxinario. Humor e dor. «Estou nunha situación anfibia», dixo o autor. Saíndo de Terranova para volver a Terranova. A liña do horizonte, a xeito de corda frouxa do funambulista; a causalidade e a casualidade; e mesmo un David Bowie que se foi, pero que no libro está, foron pasando polas verbas do escritor. Fusión de corpo, natureza e imaxinación que leveda, literatura e dereito a soñar. Iso é Terranova. «Un xeito de loitar contra a realidade é crear novas realidades. Unha novela é un proceso de descuberta, os personaxes mesmos contan cousas que descoñeces», afirmou. O Rivas lector leu, interpretou. Dixo Bragado que esta novela é unha «obra maior», das que ficarán na memoria.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Un día feliz para as librarías e os libreiros