A regueifa da semana, por Lupe Blanco
10 oct 2021 . Actualizado a las 05:00 h.Resumimos a semana,
ide collendo papel
que botamos a regueifa
neste verán de San Miguel.
Vaia semana levamos,
teremos que disfrutar
a ver se aguanta o tempo
para a ponte do Pilar
Que xa empezan as verbenas,
por dicilo de bos modos,
pero aló en Ponteceso
no vai a gusto de todos.
Mentres uns que non querían,
outros montaron o baile
e, ó final, entre o conflito
sempre sae o seu alcalde.
Seguro que vai ó baile,
bailar na punta do pé,
xa que oposición floxea
e dimite o do PP.
Outros que andan bailando
son dous concellos veciños
entre A Laracha e Carballo
a ver cal é o máis rico.
Polas rendas persoais
hai unha competición,
pero o concello que gaña
sempre é Corcubión.
Polo menos e Carballo
están mirando quen axude,
andan recollendo firmas
para outro centro de saúde.
Eu digo que lle fai falta,
iso si que non o nego,
pero a Xunta de Galicia
non vai polo mesmo rego.
Os que si que aran ben
e tamén moi ben palillan
son os da Mostra do Encaixe
nas terras de Camariñas.
Hai que ir a Camariñas,
están cheos de actividades,
hai que ver eses desfiles
e tamén a Belem Tajes.
Ata aquí chego o resumo.
Remato o meu programa,
de parte de Lupe Blanco
moi boa fin de semana.