José Manuel López, PP de A Laracha: «Un de cada catro euros van para os servizos sociais municipais»

José Manuel López Varela (62 anos) é concelleiro do PP dende 1987 e alcalde da Laracha dende 1999. Tras a renuncia de Pequeño en Dumbría, é o máis veterano da zona.

—De novo nas listas.

—Si, para continuar mellorando este municipio.

—Como leva a campaña?

—Ben, habitual, falando coa xente, explicando o nosos proxectos, lembrando o que se leva feito... Foi un mandato atípico, pola pandemia, e aínda así sacáronse moitas iniciativas en todas as áreas.

—Que pode destacar do feito?

—Hai moitos temas. Por citar algúns dos máis importantes, a construción do centro sociocomunitario en Caión, o empuxe aos dous plans especiais de educación (Agra de Leborís, todo o seu entorno); a ampliación das sendas peonís, xa rematando eses sete quilómetros de senda pola AC-552 entre Paiosaco e Lemaio... En vías, rúas, humanización, actuacións no entorno da feira de Paiosaco, no núcleo urbano da Laracha, en Caión. En varias rúas, moitas licitacións sobre a mesa. Por primeira vez hai o problema dos retrasos en execución de obras, polos problemas das empresa de atopar persoal. Temos adxudicadas e sen empezar varias obras por máis dun 1,2 millóns de euros. E outras quedan desertas, como a mellora da piscina, cerca de 135.000 euros. Tamén foi importante o plan de eficiencia enerxética, tanto no alumeado público coma nos edificios municipais. Queda posto en marcha o viveiro de empresas, para os emprendedores, con nave e despacho. No patrimonio, a compra dos terreos do castro de Montes Claros, con traballos á vista de escavación. Tamén o menhir de Erboedo, con intervencións. Estamos coa tramitación do entorno das Torres de Cillobre, e seguiremos coa croa de Santa Baia, castro e restos de campamento romano. E parques infantís, biosaudables, con moito mantemento.

—E actividades?

—Si, non é só ter instalacións, hai que lle dar vida. Hai un volume importante de actividades culturais, deportivas, de ocio e entretemento. E servizos sociais, que representan un de cada catro euros do orzamento municipal. Hai máis horas en axuda no fogar, que levan un millóns de euros. E, en servizos novos, o programa Harmoniza, servizo de canguros, madrugadores, atención temperá (único concello da comarca), axudas á escolarización. Apoio á xuventude, a mocidade, a todos os ciclos de ensino...

«Os proxectos levan o seu tempo»   

—Que lle gustaría que estivera xa rematado?

—Os proxectos levan o seu tempo, hai uns prazos, moitos informes sectoriais, administrativos, que hai que cumprir, por moito que un queira acelerala. Hai grupos sen experiencia de goberno que din que van facer tal cousa en 24 horas. E non: farán o que a normativa permite. E, con isto, temos os plans integrais de emprego, cos obradoiros (duais e de garantía xuvenil). Apostamos pola formación, por que cheguen novas empresas ao polígono. Traballamos tamén na súa ampliación, moi importante, porque estamos esgotando o solo dispoñible, só queda un 18 % por vender. E esa ampliación vai co ritmo que marca a ampliación, é un tema fundamental. E en educación levamos anos demandando a ampliación dos espazos do Agra de Leborís e a implantación de ciclos formativos axeitados.

---

---

---