Poesía toda a semana en Cee como antesala ao premio do Certame Batallón Literario
CARBALLO
María Canosa, Ainhoa Conde e Modesto Fraga serán as primeiras voces poéticas en intervir, este luns ás 20.30 horas
03 ago 2026 . Actualizado a las 05:00 h.En Cee bota andar hoxe unha semana grande de poesía. Dende este luns ata o sábado, e como parte da programación do I Certame Batallón Literario da Costa da Morte, a vila da Xunqueira acollerá seis recitais poéticos baixo o lema de Poesía na rúa. Serán outras tantas xornadas e un total de 18 voces poéticas que contribúen tamén así a festexar os 30 anos de Batallón. Modesto Fraga, María Canosa e Ainhoa Conde son os convidados de hoxe na Fundación Fernando Blanco (20.30). Marilar Aleixandre, Rafa Vilar e Rosalía Fernández tomarán o relevo mañá no monumento aos defensores das liberdades (20.30). O mércores será quenda de María Lado, David Creus e Xaime Trillo (praza Ketty Quintana, 20.30). Chegarán o xoves Miro Villar, Concha Blanco e Alexandre Nerium (praza Concha Blanco, 20.30). O venres, Xosé Iglesias, Suso Bahamonde e Roberto Traba (Praciña do Olvido, 20.30). Finalmente, xa o sábado 8, ás 13.00 na Praza da Constitución, intervirán Mónica Góñez, Moncho Bouzas e Rocío Leira.
Vai ser unha boa forma de agardar pola entrega do premio do certame, organizado polo Concello ceense co apoio de Deputación e Xunta. O acto será o domingo 9. Mereceu o galardón Xosé Luís Mosquera Camba.