Xurxo Fernandes: «Paiosaco é unha terra ben querida. Aí gravamos o vídeo de ''Sete cuncas''»
CARBALLO
O artista actuará de novo na Feira das Cereixas, desta banda con Radio Cos
02 jul 2026 . Actualizado a las 05:00 h.Foi por unha débeda co público polo que sacaron o seu primeiro disco, aló polo 2013, e é tamén por eles polo que Radio Cos emprende este verán unha xira de despedida coa que pasarán por templos da tradición como a Festa da Carballeira de Zas ou, máis inmediatamente, a Feira das Cereixas de Paiosaco.
Unha localidade, confesou Xurxo Fernandes en Radio Voz, que lles é «ben querida», por teren actuado alí en varias ocasións, pero tamén porque «foi alí, na feira de Peisaco, onde gravamos o vídeo de Sete cuncas», apuntou Xurxo, fundador, xunto con Quique Peón, desta banda.
«Coñecémonos en Xacarandaina, desvinculámonos e despois volvemos coincidir cando abriron A Repichoca na Coruña, un templo do folclore. Comezamos a cantar e foi alí onde decidimos argallar algo. (...) Empezamos no 2005, pero tardamos oito anos en sacar disco. Para aquela xa tiñamos tocado moito e foi o noso público o que nos convenceu de publicar algo», explicou Xurxo, engadindo que o seu primeiro concerto foi en Bruxelas, nun curioso proxecto que convidaba aos veciños a abrir as súas casas e acoller actuacións nos seus salóns. «A nós tocounos no barrio senegalés, nunha casa na que vivían sete homes. Eles eran os anfitrións e tiñan que facer cócteles de benvida e poñer unha alfombra vermella fóra da vivenda para que a xente soubese que alí había concerto», rememorou.
Algo máis de vinte anos despois, regresa Radio Cos aos escenarios con canto menos dúas citas na comarca: a Feira das Cereixas (domingo, 22.00 horas) e a Festa da Carballeira de Zas, lugar que para Fernandes é «casa». «Ir tocar alí é moi especial e emotivo, unha cita imprescindible. Ademais, sentímonos moi ligados ao concello por diversos motivos: Quique deu clases alí e eu fixen recollidas con xente maior», salientou o músico, que aproveitou para reivindicar a sabedoría dos maiores: «Hai que achegarse a esa xente. Lanzádevos aos vosos vellos e aprendede todo o que poidades. Hoxe en día, as modas parece que teñen moito máis peso que a experiencia á hora de dar unha orientación», lamentou.
Dúas xornadas de moita actividade
Sábado e domingo • Representantes do Concello da Laracha e da comisión de festas de Paiosaco presentaron onte a programación da Feira das Cereixas, con dous días de moita actividade: o sábado, con sesión vermú, aberto de billarda e verbena, e o domingo, coa feira, animación musical, un obradoiro infantil de cociña, actuacións tradicionais, o concerto de Radio Cos e fogos artificiais.