Promove a área de Cultura da Deputación, con catro paradas na Costa da Morte para xuño: Vimianzo, Corcubión, Malpica e Mazaricos
08 may 2026 . Actualizado a las 00:16 h.A área de Cultura da Deputación da Coruña deu a coñecer este mércores, dende o salón de plenos de Corcubión, a quinta edición de Escora Danza, un ciclo que percorrerá catro concellos da comarca no mes de xuño: Vimianzo (día 6), Corcubión (7), Malpica (13) e Mazaricos (14). Unha vez máis, apostarase pola danza como ferramenta de mediación cultural, participación social e diálogo co tecido social: «Escora Danza representa aquilo que queremos poñer en valor: o traballo no territorio, traballar para as persoas dende as persoas, traballar en comunidade, de maneira intercultural...», apuntou a deputada de Cultura, Natividade González.
Falouse en Corcubión dos beneficios da danza para a saúde e houbo tamén agradecementos, como os do edil de Cultura local Juan Carlos Cristino. É o terceiro ano que Corcubión participa na convocatoria: sen a Deputación, díxose, «nin esta nin outras iniciativas serían posibles».
Ademais de representantes de varios dos concellos e asociacións participantes no programa —ver abaixo—, tamén tomou parte da presentación Marcia Vázquez, comisaria do proxecto. O programa desta quinta edición, avanzou, apostou por presentar atención «á diversidade de corpos, de idades e de formas». Así, reivindicou a danza como «patrimonio común» e, aínda así, tamén como «algo efémero»: «O que procuramos este ano é unha danza accesíbel que represente a pluralidade da cidadanía, de identidades e realidades», dixo. Unha danza «híbrida» que se mesturará e convivirá desta volta con monicreques, circo, teatro físico ou tamén baile tradicional.
Vimianzo | 6 de xuño
Ás 18.30 horas, na Casa da Cultura. A xornada abrirase coa participación dos Coros de Cereixo e Carnés, xunto coa danza de Eva Comesaña, e incluirá a representación de «Ma p’tite dame», da creadora francesa Claire Heggen, nunha función que supón a súa primeira vez en Galiza. Entrada libre ata completar aforo.
Corcubión | 7 de xuño
Ás 18.30 horas, no Campo do Rollo. O programa neste caso reúne as pezas «Ouveo», de Mikel Aristegui, e «Son libre», de Mikel Aristegui e Clara López Villar, ademais da presentación de «As pegadas do baile», de Artur Puga. En caso de choiva, a actividade trasladarase á Casa da Cultura de Corcubión.
Malpica | 13 de xuño
Ás 19.00 horas, no porto. Acceso de balde ata completar capacidade; en caso de choiva, no centro cívico. Aquí poderanse ver os espectáculos «SO-FA(R) FROM ME (aéreo)», da compañía Martaalonsotejada, e «O. Que todo volva comezar», de Raigañas, dirixido por Rut Balbís.
Mazaricos | 14 de xuño
Ás 18.30 horas, no recinto feiral da Picota. Una proposta que inclúe «Traktor», da veciñanza de Mazaricos, dirixido por Anuska Fernández e Yas Deluaces, e «A noite do cuco», de Jandross Rodríguez. A xornada en Mazaricos rematará cunha sesión DJ a cargo de WG83.