El presunto testaferro confiesa en un escrito al juez que Zapatero medió en el rescate de Plus Ultra
Do teatro en Paiosaco ás tapas en Muxía: citas para este venres na Costa da Morte
CARBALLO
Carballo sobresae tamén con varias propostas, entre elas Primaveira enDanza, Interplay e un concerto
17 abr 2026 . Actualizado a las 05:00 h.Hoxe • Este venres 17 de abril non poderá deixar de visitar Carballo. Coinciden dous festivais, o Carballo Interplay —ver aquí— e o Primavera en Danza —ver aquí—, mais tamén hai outras citas na Costa da Morte. Entre as destacadas, todas estas:
Paiosaco • Entre o simbolismo e o realismo máxico transita a proposta de hoxe no ciclo Primavera Teatral de Paiosaco, promovido polo Concello larachés. Ás 21.00 horas, no centro sociocultural, podreán os espectadores gozar de Abra da Cabra, de Lila Teatro, a historia dunha cabra montesa que decide convivir co ser humano: «Unha viaxe tan delirante como reflexiva sobre o proceso civilizatorio, a adaptación e o conflito entre natureza e sociedade». Gratuíto.
Muxía • Bar O Porto, restaurante A Furna, Pedra de Abalar, Miramar, Antoxiños, Ven de Tapeo, cámping LagoMar e bar Caramba son os locais participantes na ruta Tapea Muxía que hoxe bota a andar na localidade. Nesta primeira xornada poderán degustarse de 19.00 a 21.00 horas, amenizada pola charanga O Rumbo. O custe: 1,50 euros. Cubrindo a ficha con selos poderase entrar no sorteo de atractivos agasallos. Dinamizar o sector hostaleiro, promover o consumo local e dar a coñecer a excelencia gastronómica do municipio: eses son os obxectivos da iniciativa.
Muxía • Máis citas na vila da Barca, neste caso no albergue Bela Muxía ás 19.00. Concerto gratuíto de cancións escritas no Camiño. De balde.
Vimianzo • Prepárase o municipio, da man da Asociación Astroturismo, para a eclipse do 12 de agosto. Charla aberta ás 19.00 horas na Casa da Cultura e posterior observación guiada dende o miradoiro de San Bartolo (Salto), ás 22.00 e 23.00. Imparte as actividades Javier Ares.
Carballo • Público miúdo de 5 a 11 anos terá nas escolas Agra de Caldas o obradoiro Contos, cantos, poemas e xogos, con Marta Ortiz. É parte do programa De landras a carballos, impulsado por Igualdade e Normalización Lingüística.
Carballo • Tamén na capital de Bergantiños, ás 20.00 horas na sede de Espiral Maior Foro (rúa Sol), actuación do grupo Quercus Blues, carballés. Huguette Periscal e Andrés Rey presentarán o seu último traballo, Cara a cara. Conduce o acto Xabier Graña. Acceso libre.
Máis Carballo • A familia LM Sports & Fitness ten hoxe unha cita importante, pois das 20.30 horas en adiante festexarase a reapertura das instalacións no polígono de Bértoa. Será tempo de coñecer novidades neste novo paso adiante polo coidado.
Avanzará asemade a Escola de Coidadores de Afaber. Cuarta sesión hoxe ás 17.00: o papel da logopedia nas enfermidades. Imparte Nerea Vázquez no local social da entidade, en Mirón, Bértoa.
Cee • Bota a andar o programa Emprende! do GALP Costa da Morte: 17.00 horas, sala de conferencias da Casa da Cultura de Cee. Unha cita para quen pense emprender ou para quen emprendese e precise asesoramento.
A Laracha • Cita coa solidariedade. Unha unidade móbil para a doazón de sangue prestará servizo hoxe de 10.00 a 14.00 e de 16.00 a 21.00 na Praza do Concello larachesa.