O hotel-restaurante de Balarés e o Bela Fisterra levan dous dos Premios do Turismo da Deputación

Dous proxectos da Costa da Morte foron recoñecidos na primeira edición dos Premios de Turismo da Deputación da Coruña, cuxa gala se celebrou onte no Hotel NH Finisterre da Coruña. O hotel-restaurante Balarés, de Ponteceso, recibiu o galardón á mellor iniciativa de innovación e calidade turística, mentres que o Bela Fisterra foi premiado no apartado de sostibilidade social aplicada ao turismo.

O xurado, composto polas técnicas de turismo de Carballo, Dumbría e Ames —Maite Parga, Ada González e Sonia Moure, respectivamente— tiveron en conta criterios como o fomento do turismo responsable, a promoción dos proxectos, o uso do galego, o fomento da conciliación ou a presenza de políticas de xénero, entre outras cousas.

Tanto o Balarés, como o Bela Fisterra, como os outros tres proxectos premiados, recibiron como agasallo unha figura en forma de nó feita por Jorge Eiroa: unha metáfora de conexión, vínculo, unión e forza do sector turístico.

Así mesmo, entregáronselle galardóns aos oito xeodestinos da provincia, entre eles a Costa da Morte. Neste caso, unha peza de cerámica do obradoiro carballés Crúa, de María Barca. A xornalista Lorena Pose conduciu o acto, no que interviñeron o presidente provincial, Valentín González, e o vicepresidente Xosé Regueira.

---

---

---