Diego López, chef de La Molinera: «En horas de apuro de traballo, co plástico despístaste un pouco»

Na hostalería xérase un volume importantísimo de residuos. «Xa hai tempo que temos unha conciencia plena sobre a maioría das cuestións a ter en conta, pero á hora da reciclaxe, algúns aspectos dan un pouco de máis traballo», recoñece Diego López, responsable do restaurante La Molinera, de Lalín.

—Fundamentalmente, a que residuos lles teñen que prestar atención en establecementos como o seu?

—No tema do vidro, do aceite e do cartón, xa hai moitos anos que o sector está involucrado porque é moi doado de separar. É un xesto cómodo á hora de tiralo. Podes ir co lixo ordinario e cun taco de cartón que só tes que depositar no contedor correspondente. Para o tema do aceite, por sorte, temos unha ampla gama de recollida. Só hai que ter un bidón para recollelo. No noso caso, aquí non xeramos moito, pero hai outros locais nos que si fan moita fritura e gastan unha gran cantidade. E co vidro igual, é moi sinxelo de separar.

—Algunha materia pendente?

—Creo que no tema do plástico, do que vai ao contedor amarelo. Aí, ao mellor, en horas de moito apuro de traballo, despístaste un pouco. É fácil separar bricks de leite, pero á hora do traballo forte, esa chapa, ese tapón, ese pequeno plástico ou ese sobre de azucre é fácil que acabe no contedor verde.

—E contra o desperdicio alimentario, como se loita desde a hostalería?

—A xente cada vez é máis consciente. Por exemplo, veñen comer un cocido e, se sobra, os clientes piden que o preparemos para levar. E nós encantados de que o leven. Axustar no tema do orgánico é complicado. No noso caso, o que sobra remata todo na casa da aldea e alí xa lle damos o último uso.

---

---

---