Jorge Mira: «A calidade do ceo nocturno é unha parte moi importante do patrimonio da Costa da Morte»

O físico Jorge Mira de Baio (Zas), coordina as Aulas Científicas A Luz da Ciencia en Dombate, que comezan hoxe e ás que pode asistir calquera persoa que o desexe, de forma totalmente gratuíta e sen inscrición previa. Serán no exterior debido ó bo tempo e para reducir o risco de contaxio de covid.

—Xa van unhas cantas xornadas celebradas en Cabana e agora chega unha nova.

—Estou moi satisfeito, sobre todo, polo nivel alto de poñentes que conseguimos, porque non é doado. Ademais, estou moi apegado á zona, polo que me resulta máis gratificante aínda. Trátase dunha reciclaxe de conceptos científicos para que repercutan no territorio, na súa xente e nos que nos visitan.

—Por que a protección do ceo nocturno como eixo central desta edición?

—Por unha parte, é unha sinerxía co proceso de petición para que a Costa da Morte se converta en destino Starlight. De outro lado, a orientación astronómica de Dombate e o último solpor de Europa dende Muxía a Fisterra, durante certos meses mostran o potencial da zona. A Costa da Morte ten moitos valores e entre eles está o de que é un sitio puro e coidado.

—Que temas máis concretos se abordarán nas sesións de hoxe e mañá?

—A luz, aínda que pareza raro, contamina. Un farol ten que alumar cara o chan, non cara o ceo. Ademais, non todas as cores son óptimas. Destas cousas falará a directora xerente da Fundación Starlight, Antonia María Varela, con certificacións por todo o mundo. Tamén Susana Malón, física especializada en iluminación artificial. É a principal experta española neste campo. Tratará como iluminar as vías, os espazos e os edificios. Ten feito moitas adaptacións en destinos Starlight. A maiores, na primeira das mesas redondas, abordaranse as vantaxes de obter o selo. Para iso xuntaranse por vez primeira representantes dos tres destinos en Galicia. A Costa da Morte pode ser o primeiro destino da Coruña. Por outra parte, a segunda mesa xirará arredor da contaminación luminosa: que problemas hai, moitas cousas que corrixir.

—Na Costa da Morte habería moitos aspectos que mudar?

—Algúns que vixiar, pero o certo é que nos gobernos non hai información dabondo para facelo. Hai vontade, iso si.

—É unha zona rural, algo que a beneficia.

—Máis da metade da poboación mundial non pode ver as estrelas, cando hai décadas si que era posible. A xente das cidades ten que ir a sitios específicos. Temos que ver, por tanto, que a calidade do ceo nocturno é unha parte moi importante do patrimonio da Costa da Morte. No momento que se consiga o selo, vaise poñer máis en auxe.

—Cales son os lugares destacados con capacidade de observación?

—Punta Nariga en Malpica, Fisterra, Touriñán en Muxía, o dolmen Arca da Piosa en Zas, Mazaricos...

---

---

---