As actividades, moitas e diversas, concentraranse en tres xornadas, dende mañá ata venres: días 18, 19 e 20
17 may 2022 . Actualizado a las 05:00 h.
Dende mañá ao venres • «Baixo o eco dos versos de Florencio Delgado Gurriarán», o instituto Maximino Romero de Lema de Baio ten programada para mañá, xoves e venres —días 18, 19 e 20 de maio, por tanto—, a 16.ª edición da súa Semana Cultural. Toda unha serie de iniciativas que, como din dende o centro, «teñen como protagonistas á nosa cultura e á nosa lingua en moitos e variados aspectos», convencidos da importancia destas como «ferramentas pedagóxicas educativas e formativas».
A defensa do patrimonio —coa voz de Felipe Senén—, a importancia de conservar as árbores autóctonas —da man de Nieves del Pilar Vidal—, a riqueza de coñecer os límites da Terra e do Universo —con Íñigo de la Cuadra Salcedo—, o recoñecemento e respecto pola diversidade afectivo-sexual (Quérote+), o coñecemento de mulleres referentes do cine (con Olga Osorio), a concienciación ante o abandono dos animais (co Centro de Protección Animal de Zas), a creación fotográfica (Lois Cid, Xurxo Lobato, Sol Mariño...), a poesía e o teatro (con Dolores Tembrás, Redrum e Os Quinquilláns), os hábitos saudables na alimentación (con Noa Vázquez), a saúde mental na adolescencia (con Alberto Ramos, da Unidade da Prevención do Suicidio C. S. San José de A Coruña e Sara García, da Unidade de Saúde Mental de Carballo), os drons (con Óscar Rey), o deseño e a impresión en 3D, con Marta Diz, ou o uso correcto de Internet, con Adrián López, estarán entre os moitísimos temas que abordarán. Pecharán todas estas actividades cun concerto do grupo Arredores (12.45 do venres).
