ESPECIAL LETRAS GALEGAS 2022 | As actividades culturais irán moito máis alá dun día: para hoxe, xa hai unha boa dose. Concellos e entidades apostan por teatro, narración ou música para as idades máis temperás. Tamén para adultos haberá recitais, baile, contos, premios ou teatro...
14 may 2022 . Actualizado a las 05:00 h.Xa sexa nos centros educativos ou nas programacións municipais, nenos e nenas son público destacado de moitas das actividades deseñadas en torno ás Letras Galegas na Costa da Morte. Gozar da cultura en familia é, por exemplo, a proposta de Vimianzo para mañá, domingo 15: festexan as Vimiletras, das 17.00 en diante, na Praza do Concello, con inchables, animación, música, teatro ou talleres de tatuaxes e globoflexia. Entre os pratos fortes, Cantaxoga, de Migallas, unha oda á lingua galega e aos moitos estilos musicais que se poden facer nela.
Por Malpica pasou xa Lidia Botana con De aquí para alá, un concerto didáctico. Ás bibliotecas dos centros e mais á municipal fíxoselle chegar, doutro lado, exemplares de Os Bolechas. As miñas primeiras Letras, Florencio Delgado e de Florencio Delgado Gurriarán: polos vieiros da saudade. Para hoxe, sábado, está prevista no entorno do río de Vaa a representación de Muiñada, da compañía carballesa Galeatro (17.30). Culturactiva ofrecerá o martes, no Forno do Forte, ás 17.00, o espectáculo familiar Rosalía, mentres que Charo Pita intervirá ás 18.30, na Praza Anselmo Villar Amigo, con A familia Papaventos: música infantil. Tamén todo isto de balde.
O Concello de Coristanco, doutro lado, en colaboración cos centros Xosé Pichel, Canosa-Rus, Bormoio-A Agualada e CRA A Tarandeira, promoveu a sétima edición do certame artístico e literario Asunción Antelo. Neste municipio, o martes ás 11.30 horas, a biblioteca abrirá as súas portas á escritora Antía Yáñez e aos seus experimentos, unha revisión da dualidade ciencias-letras.
As Letras na Rúa de Carballo, o 17 no xardín municipal, tamén terán destacado espazo para os máis novos, dende o contacontos familiar O garoto de Ipanema, con Caxoto (11.00 horas), ata o concurso infantil de pintura e debuxo Luís Calvo, promovido por Lumieira (11.00, xa 40.ª edición), pasando polo concerto O Soño dos Golfiños (12.00). A festa lúdico-deportiva Correlingua e os Ratos de Lonxetodo seguirán festexando as Letras na capital de Bergantiños 18, e aínda máis para adiante quedarán citas teatrais con Vagalume, dúas delas Ñac Ñac e A verdadeira historia de Hansel e Gretel (sábado 28, 18.00, Pazo).
Seguindo coa oferta para os máis novos, boa parte do programa en torno ás Letras do Concello da Laracha teraos a eles como destinatarios, a maiores, por certo, do concurso de marcapáxinas para escolares: Migallas Teatro con Brincadeiras da lingua, este vindeiro luns 16 (18.00, Casa da Cultura da Laracha); Talía Teatro con Rosa Caramelo e outras historias, o mércores 18 (19.00, biblioteca de Paiosaco) e Magín Blanco, con O que levamos nas maletas, o xoves 19 (18.00, centro sociocomunitario de Caión).
Predominan igualmente os pequenos no almanaque de Camariñas: xincana Florencio Delgado este luns 16 (16.00), contada musical con Charo Pita o 18 (11.00, biblioteca) e obradoiro de esculturas de papel o 19 (16.00, biblioteca). O martes 17, na vila do encaixe, entregaranse os premios do certame Letras Galegas (12.00) e poderase colorear a imaxe do homenaxeado este ano.
O camerunés Boni Ofogo, finalmente, contará contos para os máis novos, hoxe, no Couto, Ponteceso: 12.30 horas. Nunca faltaron nas Letras desta Aldea actividades para os máis pequenos.
Premios Contos de Primavera, hoxe en Carballo
O salón de actos de Conservas Calvo acollerá hoxe, sábado, ás 12.00 horas, a entrega dos premios correspondentes á quinta edición do certame Contos de Primavera, promovido por La Voz e Radio Voz, co patrocinio, precisamente, do grupo Calvo. Foi a alumna Irene Ramón, do Manuela Rial de Cee, a que se fixo coa maior puntuación polo seu traballo O meu camiño, se ben haberá detalles para os dez textos máis valorados e tamén un accésit. Tres alumnos do Conservatorio de Carballo ofrecerán pezas ao acordeón e guitarra.
Recitais, baile, contos, premios e teatro... tamén para adultos
Non só hai nas Letras espectáculos de tipo familiar. Moi ao contrario, abunda a oferta:
Carballo
O venres 20 presentarase no Pazo un manual de boas prácticas na xestión culturas das artes visuais. Tamén ese día, continuando co ciclo audiovisual Mestre Mateo, poderá verse o documental A poeta analfabeta (20.30, Pazo). Vagalume Animación ofrecerá dúas pezas teatrais o sábado 21 (20.30, Pazo) e participará o domingo 22 no Ciclo Marusía Escénica As Mariñas-Bergantiños, encontro de teatro afeccionado ao que tamén chegarán formacións de Oleiros e Bergondo. Haberá que sumarlle novas funcións sábado 28 (20.30) e domingo 29 (18.00).
A Laracha
Mañá, domingo, ás 18.00, na Praza Olonne Sur Mer, actuación das entidades culturais Santa María de Torás, Queiroga de Paiosaco e Arume de Caión.
Ponteceso
Dentro do programa ODezasete, que promove a Fundación Pondal co apoio do Concello de Ponteceso, programouse para esta noite (22.30, Casa dos Veciños, donativo de 3 euros) un monólogo a cargo de Boniface Ofogo. Mañá, domingo, será día de ofrenda floral e de entrega dos Premios Bos e Xenerosos (12.30), acto complementado cunha exposición dos 40 anos das Festiletras. Para o martes quedará un recital poético, Dose de reforzo: Rosalía Fernández, Claudia Castro, Suso Lista, Alexandre Nerium e Xurxo Souto (16.30, na Casa dos Veciños). A función teatral de Badius (Baio), programada para o luns, tivo que ser aprazada, informou a organización.
Malpica
Presentouse onte a obra literaria Edénicas, de Andrea Fernández, gañadora do 16.º Certame de Poesía Erótica Illas Sisargas, convocado pola entidade Caldeirón. O 27, ás 12.00, daranse a coñecer as bases da 17.ª edición do concurso.
Dous roteiros literarios
Coristanco programou para o 21 de maio o roteiro literario Asunción Antelo, itinerario narrativo polos espazos vitais e literarios da Rexoubeira de Bergantiños: Abellariza, O Carballal, Muíño Seco, Seavia... Nel, voces locais recitarán versos desta creadora de Segufe. Saída ás 10.00 dende o edificio de Servizos Múltiples. Necesaria inscrición: bibioteca@coristanco.gal ou 651 664 908. Doutra banda, no ciclo ODezasete pondaliano, Manuel Ferreiro, Felipe Senén e Félix Neira guiarán un roteiro comentado por Muxía.