Ledicia Sola, actriz: «Un xesto importante para min foi facerme flexitariana»
CARBALLO
ECOVOZ 2022 | Participa no espectáculo teatral Cigarreiras. Aquí fala dos seus hábitos ambientais
07 feb 2022 . Actualizado a las 05:00 h.A actriz Ledicia Sola é unha das Cigarreiras, espectáculo teatral baseado na Tribuna de Emilia Pardo Bazán. Comparte elenco con outras das convidadas, na edición pasada, á sección de Ecoartistas. O pasado venres ela foi a protagonista.
—Están xirando por Galicia, como está funcionando?
—Está a ser unha ledicia facer este traballo. Levamos o premio do público en Carballo. Pero en cada función é así. Polo de agora é unha obra que está funcionando moi ben e que a xente lle gusta. Nótase no momento dos aplausos e nos cheos que hai nos teatros.
—No que nos ocupa, os asuntos medioambientais, como se define?
—Estou moi sensibilizada con estes asuntos. Tamén concienciada e, por iso, fago todo o que está na miña man aínda que non sempre son capaz de facer o que me gustaría. Mudei moitas cousas con respecto a este tema.
—Cales?
—Un xesto importante para min foi facerme flexitariana. Encantaríame ser vegana ou vexetariana. Non son radical, pero para min foi un cambio, a decisión de intentar consumir a menor cantidade de alimentos animais posibles. O tema da reciclaxe e do consumo dos plásticos tamén o teño moi presente. Hai que cambiar o chip porque non é tan difícil.