O Vákner inspira un certame de relatos para adultos

P. blanco CARBALLO / LA VOZ

CARBALLO

Recreación do Vákner CÁNDIDO PAZOS

La Voz e Radio Voz, co patrocinio do Concello de Dumbría e a Deputación, convocan este concurso, para maiores de 16 anos. Queda convocada, tamén, a segunda edición do certame dirixido a escolares

07 feb 2022 . Actualizado a las 13:13 h.

La Voz de Galicia e Radio Voz, co patrocinio do Concello de Dumbría e a Deputación da Coruña, veñen de convocar a primeira edición do certame de relatos Territorio Vákner dirixido a adultos, isto é, a maiores de 16 anos. Contribuír á divulgación e ao fomento da creatividade literaria en relación ao Camiño de Fisterra e Muxía, vía percorrida durante milenios por peregrinos chegados de todos os recunchos do mundo, é o obxectivo primordial desta iniciativa. Trátase dunha ruta e aventura vital que se veu reflectida en multitude de manifestacións literarias e históricas que, segundo trasladan as bases, «poden e deben ter continuidade no patrimonio colectivo en forma de novas creacións». Ao mesmo tempo, e como o nome do certame indica, preténdese darlle unha dimensión literaria ao feito histórico de que, no ano 1493, o bispo Mártiros de Arzendján, de Armenia, se tivese enfrontado en terras de Dumbría a un monstro: era el, o chamado Vákner.

Os relatos que se presenten han de ter unha extensión mínima de 4.000 caracteres, espazos incluídos, e unha máxima de 6.000. A temática das narracións, en todo caso, ha de gardar relación cos misterios no Camiño de Fisterra, o monstro Vákner ou similares, que teñan como escenario a ruta de Fisterra e Muxía. O certame Vákner xa tivo unha primeira edición, pero dirixida a escolares. Esta, para maiores de 16 anos, é a primeira para plumas adultas.

COLEXIO O COTO (NEGREIRA)

De entre todos os relatos que se reciban, un xurado encargarase de elixir aqueles dez que, segundo consideren, teñan unha mellor calidade literaria, sexan máis orixinais e tamén máis adaptados ao escenario da convocatoria literaria. Os tres primeiros serán publicados, ademais, nas páxinas de La Voz de Galicia. O autor do relato gañador e os autores do segundo e terceiro texto máis valorados recibirán o seu correspondente diploma, así como premios en produtos ou servizos propios do Camio de Fisterra e Muxía, ademais dunha peza distintiva e exclusiva propia deste certame. Os participantes que rubriquen os restantes sete textos con máis puntuación recibirán cadanseu diploma e, asemade, unha peza distintiva.

Cada autor deberá enviar os seus textos identificados con un lema e un pseudónimo, acompañados por un sobre pechado cos datos persoais. Farán chegar os relatos á delegación de La Voz en Carballo (rúa Gran Vía, número 84, 1.º, 15100, Carballo). O prazo remata o vindeiro 28 de febreiro.

ANA GARCIA

Segunda edición para os escolares dos concellos do Camiño de Fisterra e Muxía

Territorio Vákner é un certame literario que tamén ten apartado para escolares: Contos de misterio no Camiño. De feito, este foi o xermolo. A primeira e única edición [pode ler aquí os textos premiados] convocouse no 2020, mais a entrega de premios, pandemia de por medio, tivo que ser no 2021: gañou Deva Pérez de León, do colexio Montessori Compostela. La Voz de Galicia e Radio Voz, co patrocinio novamente o Concello de Dumbría e a Deputación da Coruña, veñen de convocar, agora, a segunda edición. Descubrir o talento literario e espertar a imaxinación entre os escolares dos concellos polos que transcorre o Camiño de Fisterra e Muxía (Santiago, Ames, Negreira, Santa Comba, Mazaricos, Dumbría, Cee, Corcubión, Fisterra e Muxía) é o obxectivo central da iniciativa, á vez que seguir dándolle unha dimensión literaria ao encontro do bispo Mártiros co aterrador monstro Vákner.

No caso deste concurso para escolares, haberá dúas categorías. A primeira, para estudantes de quinto e sexto de primaria. A segunda, para estudantes da ESO en centros dos municipios mencionados. Cada un dos contos poderá ter unha extensión máxima de 1.500 caracteres. A temática ha de gardar relación cos misterios ou co terror e, en concreto, co Vákner. De entre todos os contos, un xurado elixirá os cinco mellores de cada categoría, e serán publicados en La Voz. Haberá premios para os tres mellores de cada apartado e diplomas a todos os demais seleccionados. Ao igual que os adultos, cada colexio deberá enviar os textos correctamente identificados á delegación de La Voz en Carballo (rúa Gran vía, 84, 1.º, 15100, Carballo) ou ben a eventos.carballo@lavoz.es. O prazo de entrega é o mesmo: han de facerse chegar, por tanto, antes do 28 de febreiro.

Un novo tempo para as letras e para o Vákner

PATRICIA BLANCO