É no coñecemento é onde xurde a imaxinación, a creatividade e tamén o interese. Se tes coñecemento, aprendes a respectar. É por iso me gusta tanto facer libros, véxoos coma pequenos tesouros que poden cambiar a nosa percepción das cousas. Gústame ilustralos, porque penso que as imaxes enriquecen o texto a tal punto que axuda a creatividade e a imaxinación do lector. A que soñe, a que comprenda e queira aprender máis do mundo que o rodea. A posibilidade de que algo que antes era invisible, agora se transforme en eterno, levándoche máis alá e persistindo na memoria. Porque se uns poden facelo, porque eu non? É un bo trato traballar de algo que che inspire, que che guste e faga sentir así.
Eu, dende logo, non o cambiaría por nada do mundo.
En detalle
Nacida no 1994, Laura criouse entre Cee e Dumbría, de onde é orixinaria a súa familia materna e paterna. Graduada en Belas Artes pola Universidade Politécnica de Valencia, cursou un máster na escola Elisava de Barcelona, especializándose en ilustración e cómic. Como ilustradora e autora, ten publicado traballos con editoriais como Penguin Random House, Dibbuks, Xerais ou o grupo Edelvives. Nos últimos tempos, Laura publicou con Galaxia a obra Monte Pindo. Historias e lenda do olimpo celta, que xustamente hoxe presentará na fervenza do Ézaro, en Dumbría, ás 11.30.
