As Festiletras acabaron no seu primeiro día coa fenda entre ciencia e literatura

Marta López CARBALLO / LA VOZ

CARBALLO

Volveu obrarse o «milagre» no Couto, con actividades ata o domingo

02 sep 2021 . Actualizado a las 05:00 h.

Pouca presentación precisa xa a estas alturas unha cita como a das Festiletras. Xa van 39 anos de «milagre» cultural na aldea pontecesá de O Couto e, lonxe de apagarse, a chama do saber e da curiosidade está máis acesa ca nunca. De novo fóra das súas fechas habituais por mor da pandemia, onte arrancou unha nova edición dunha cita que, promovida pola Fundación Eduardo Pondal, bebe directamente da vontade colectiva e da implicación veciñal. E é que non só a sede da entidade acolle as moitas iniciativas promovidas dende onte e ata o domingo, senón que as propias rúas da vila bulen con actividade. Entre A Travesa e a Rúa do Campo, por exemplo, traballan dende onte Mou e Sokram, o dúo que conforma o colectivo Mutante Creativo. Se o tempo acompaña, nestas xornadas deixarán a súa pegada no Couto cun mural no que reflectirán as orixes musicais da aldea.

Lecturas literarias con acompañamento científico para demostrar que letras e ciencias non son excluíntes, moita música e obradoiros infantís encheron de coñecemento a primeira xornada.

Ana Garcia

Canosa-Carracedo, un tándem que xa comprometeu unha nova colaboración nun futuro

«Logo de ler este libro, non teño dúbida ningunha de que me gustaría ter a María no meu equipo de investigación». Estas palabras escribía o xenetista e divulgador Ángel Carracedo no limiar de H2... Oh!!! Pingas científicas, da ceense María Canosa. Probablemente o de compartir equipo será complicado, como el mesmo recoñece máis adiante no texto, pero a colaboración xurdida entre ambos irá máis aló desta publicación, da que onte falaron no Couto.