O mes de setembro trae «Esencia de Festiletras»

A Fundación Pondal festexará as Letras, nunha edición peculiar, do 31 de agosto ao 6 de setembro. Sés ou Xabier Díaz estarán no Couto. A celebración, adiada no mes de maio, incluirá artesanía, música, ciencia, recoñecementos... Todo en espazos abertos e con aforo limitado

SES EN UN CONCIERTO RECIENTE EN A CORUÑA
SES EN UN CONCIERTO RECIENTE EN A CORUÑA

Carballo / La Voz

A escritora Fina Casalderrey, xa recoñecida como Boa e Xenerosa e homenaxeada incluso moitos anos antes na Casa dos Veciños, dixera entón que a aldea do Couto, en Ponteceso, era un «frasco pequeno cheo de esencia». Esencia artesá, musical, literaria, científica... Cultural, en definitiva. Aquelas súas palabras inspiran as Festiletras deste 2020, que a causa da pandemia do covid-19 ficaron convertidas nun encontro que dende a Fundación Eduardo Pondal, organizadora última da cita, deron en chamar Esencia Festiletras, e que se desenvolverá entre o 31 de agosto e o 6 de setembro. Sería a 38.ª edición. O coronavirus impediu o tradicional festexo das Letras Galegas en maio, se ben xa daquela se anunciou un aprazamento agardando outros tempos. Pese a todo, non deixou de facerse o 17 un encontro virtual de corenta persoeiros de diversas disciplinas, nin tampouco se deixou de interpretar o Himno.

Apoio á cultura

Chegada a nova normalidade, a organización amosa o seu empeño en non saltar nin o máis mínimo os consellos das autoridades sanitarias, de aí este Esencia Festiletras, un formato reducido. Así, o público dos distintos actos será sempre limitado e haberá un estrito control de todas as persoas que se acheguen, cumprindo ademais todas as medidas de seguridade e hixiénico-sanitarias precisas. «Foi unha decisión difícil para nós», indican dende a Fundación pontecesá. A celebración, agora, ten un fin claro: «Seguimos adiante co único obxectivo de preservar os ingresos dos artistas e así manifestar o noso apoio ao mundo da cultura». María Xosé Silvar, Sés, ou Xabier Díaz e as Adufeiras de Salitre, encabezan un cartel no que haberá moito máis: representantes locais, comarcais...

Espazos ao aire libre

Os emprazamentos das diferentes propostas serán ben singulares: eiras, cabanotes e encrucilladas ou cruces de camiños, todos eles espazos ao aire libre que acollerán tanto os concertos do sábado e domingo como as propostas divulgativas dos cinco primeiros días deste Esencia Festiletras, e que dalgunha forma alongarán a Escola de Verán 2020 cos convidados e convidadas.

Cadeiras separadas e control sanitario

Ademais da elección de espazos abertos para a celebración dos diferentes encontros, así como a redución de aforo a cantidades moi pequenas de público, a organización velará pola seguridade e o cumprimento de todas as medidas indicadas polas autoridades en torno ao covid-19. Os asistentes disporanse en cadeiras separadas, gardando a necesaria distancia e, isto é, sempre sentados. Haberá control sanitario (medición da temperatura, como se está facendo agora na Escola de Verán) e incidirase no obrigatorio uso de máscaras. Durante a celebración dos concertos dos días 5 e 6 de setembro non estará tampouco permitida a consumición de bebidas nin de comida: tamén se prohibirá fumar no recinto, avanzan. Do control de acceso encargarse unha empresa privada de seguridade, así como tamén os axentes da Policía Local e os integrantes de Protección Civil do Concello pontecesá.

A cultura ben pode ser segura, reivindicaron moitos artistas nestas últimas semanas. Esencia Festiletras pretende ser un encontro de apoio a este sector, que tamén é motor económico.

Avance da programación

Do 31 de agosto ao 4 de setembro 

  • DE 10.00 A 14.00 HORAS. Burbullas científicas, literarias e artísticas. Polo Couto pasarán as contadas de Vero Rilo; as viaxes mariñeiras de Xurxo Souto; a literatura de Yolanda Castaño; o rock&roll de Laura Romero e Pakolas; a música de Orquestra; os obradoiros teatrais, de Lucho Penabade na lembranza de Mourelle de la Rúa; os talleres científicos, conferencias e espectáculos Festiciencia da man de Ceo Aberto; as arquitecturas de Palitroques nas que terá cabida a figura de Domingo Antonio de Andrade; as intervencións dos profesores Carracedo, Rabuñal e Mariño...
  • A PARTIR DAS 18.00 HORAS. O luns 31, ciencia a cargo de David Ballesteros. O martes, instrumentos con X. L. Romero e Pepe Vaamande. O mércores, coa artesá Elena Ferro. O xoves, Saberes de muller, documental de Omar Rabuñal. O venres, Aldeas Singulares, foro de propostas sobre o rural: como convidados, Fundación Brandomil; Asociación Parroquial de Berdoias; directora da banda municipal infantil de Xinzo; directora de Familia, Infancia e Dinamización demográfica; Fundación Uxío Novoneyra; Fundación Santa María la Real; Jaime Izquierdo, Fundación Juana de Vega e Óliver Laxe.

Sábado 5 de setembro

  • 18.00 horas. Concerto de Sés. Na eira da sede da Fundación Eduardo Pondal, con aforo moi limitado, e ao abeiro da Rede Cultural dea Deputación. As entradas deben mercarse de forma anticipada, online, en Ataquilla.com, a un prezo de 6 euros. Nesta mesma tarde tamén se lle entregará o premio Literatas 2020 a Irma Macías, a voz vimiancesa da formación Luar na Lubre. Darallo a regueifeira Lupe Blanco.

Domingo 6 de setembro

  • 18.00 horas. Concerto de Xabier Díaz e as Adufeiras de Salitre. Tamén na eira da Fundación Eduardo Pondal, e con aforo moi limitado. Igualmente, ao abeiro da Rede Cultural da Deputación. Entradas a 6 euros en Ataquilla.com: cómpre mercalas previamente. Xabier Díaz recibirá ademais neste día o Premio Bo e Xeneroso 2020. Entregarallo o presidente da fundación, Lois García.

E ademais...

OS NOMES DOS LUGARES

  • A artesanía nunca deixou de estar presente dende o ano inaugural das Festiletras. Nestas, aínda sendo esencia, tampouco. Colocaranse placas de barro de Buño, elaboradas por Carmen Isabel Labrador, muller pioneira, nos rueiros da aldea do Couto.

A VOZ DA PAISAXE

  • Instalación dunha lona cunha fotografía de Damián Varela e unha imaxe do Monte Branco. Acompaña un texto de Eduardo Pondal. Situarase na fachada da Casa do Rosquilleiro.

MURAL

  • Obra de Luís Davila, que os días 2, 3 e 4 de setembro plasmará no inicio dos pasacabanotes. Non é a primeira intervención artística perenne no Couto: só por citar unha das máis recentes, está a obra de Yoseba MP, cunha clara mensaxe en favor do coidado do mundo rural e da prevención de incendios.

Colaboradores públicos e privados para que esta 38.ª edición tan atípica poida ser posibl

A Fundación Eduardo Pondal ten unha boa listaxe de colaboradores para que esta cita sexa posible. Entre as institucións públicas que achegan o seu gran de area ás Festiletras están Ministerio de Ciencia e Innovación (Fecyt), Xunta de Galicia (Xacobeo 2021, Dirección Xeral de Políticas Culturais, Secretaría Xeral de Política Lingüística, Consellería de Educación, Dirección Xeral de Familia, Dirección Xeral de Territorio e Paisaxe, Dirección Xeral de Comercio, Secretaría Xeral de Igualdade, Galicia Calidade e Consello da Cultura Galega), Fundación Juana de Vega, Fundación Camilo José Cela, Deputación Provincial da Coruña e Concello de Ponteceso.

Tamén empresas privadas se comprometeron con esta celebración tan especial das Letras Galegas: Gadis, Deleite, Bico de Xeado, Terras Gauda, Mahou, Conservas Calvo e Madouma, segundo detalla a organización.

Unha cita con moitos implicados: veciños, artistas, voluntarios...

A Fundación Eduardo Pondal, no anuncio desta próxima programación, quixo dar as grazas a todas as institucións públicas e privadas que fan posible un ano máis, aínda que sexa nestas condicións excepcionais, «este pequeno milagre nunha aldea do noso rural». «O noso agradecemento á confianza depositada en nós polos nosos veciños e veciñas. O noso agradecemento para o noso voluntariado, que sempre está disposto a botar unha man cando é necesario. O noso agradecemento para os científicos, literatas, artistas de todo tipo que acoden gustosos á nosa chamada. O noso agradecemento a todos os que fan visibles as nosas actividades nas redes, na prensa, na radio ou na televisión», expresaron tamén.

A idea do milagre hai tempo que callou no Couto, que acolle así o que Neira Vilas tiña definido como a celebración das letras máis grande do país. Apenas quedan xa uns días para o comezo do programa, polo que os interesados, sobre todo, neses dous concertos con aforo tan limitado, han de darse présa en reservar os billetes. Do 31 de agosto ao 6 de setembro será tempo de vida en Ponteceso.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

O mes de setembro trae «Esencia de Festiletras»