A comparsa ceense obtivo varios premios nos certames máis importantes da comarca
04 mar 2020 . Actualizado a las 05:00 h.Primeiros en Muxía, Camariñas e Dumbría; segundos en Cee; terceiros na Ponte do Porto e cuartos en Cee e Fisterra: o entroido da Costa da Morte ten novos monarcas e eses son Os Enjominados de See. A comparsa ceense, con traxes e espectáculo baseados nas figuras míticas do Camiño de Santiago, lograron bos postos na maioría dos grandes certames de carnaval da Costa da Morte.
Tamén as comparsas fisterrás colleitaron destacables éxitos, como o pleno conseguido na casa ou o dobre premio de Os da Charca en Cee, que foron recoñecidos tanto na categoría de carrozas como na de comparsas. Con espectaculares disfraces, non destacan tanto as agrupacións fisterrás polo colorido (que tamén) senón pola espectacularidade das súas actuacións. Ademais dunha retórica e unha retranca non apta para sensibleiros, ata as piruetas tiveron presenza en espectáculos como Os da Charca. Igual de espectaculares estiveron Os Trotamúsicos e Tortugas y Peces, que completan o tridente de comparsas fisterrás.
Da Ponte do Porto saíron tamén varias agrupacións amplamente recoñecidas nos certames da comarca, como O reino fantástico ou As palomitas da Ponte. Xunto a elas, As Costas das Mulleres, unha comparsa de Camariñas que fusionou a tradición, a etnografía e o feminismo, propoñendo un espectáculo reivindicativo e co empoderamento feminino no radar.
Chea de humor estivo a proposta de Vilaño dá a campanada, pois recolleron con sorna algúns dos elementos máis característicos da noitevella: Cristina Pedroche e os seus arriscados traxes, Gayoso, o cava, as uvas, as avoas que festexan dende o sofá e ata unha torre de reloxo estiveron presentes.
Dende Vimianzo, e igualmente espectaculares, participaron A arca de Noé e A través da pupila, da asociación Trubisquiña, que mesturou unha estética feminista cunha mensaxe ecoloxista.