A regueifa da semana, por Lupe Blanco
29 dic 2019 . Actualizado a las 05:00 h.Hoxe boto a regueifa
aínda que a algún faga dano,
toca facer o repaso
do melloriño do ano.
Os tempos serán chegados
nesta era futurista,
a personaxe do ano
é unha nena ecoloxista.
Benvida, querida Greta,
conseguiches boa audiencia,
coa imaxe que reflexa
espertou moitas conciencias.
Foi un ano de conflitos.
a xente non quere tratos,
eu penso que en Catalunya
o asunto vai para rato.
Ninguén vai baixar da burra,
ese tema segue quente,
mentres no resto de España
seguimos sen presidente.
Vai rompendo a unidade,
mirade para o caudillo,
que tamén dou titulares
por cambiar de domicilio.
Houbo noticias abondo,
pero non todas son boas,
vimos arder Notre Dame
e tamén o Amazonas.
Non faltaron as protestas,
que o mundo non está contento,
se miramos cara Chile
creo que é o gran exemplo.
Aquí hai cousas que non cambian,
coma os montes de eucaliptos,
seguen encallando barcos
e aparecen submarinos.
Tampouco paso por alto
o que toca mellorar,
no tema da violencia
aínda hai moito que cambiar.
Pero seguimos loitando,
hai que facer os deberes,
acabáronse as escusas
cos dereitos das mulleres.
Pido para o 2020,
e de todo corazón,
que teñamos mais civismo
e tamén educación.