Paula Pérez: «Ver o meu nome no libro foi algo incrible»

Promete, e moito, a carreira artística desta moza vimiancesa, á que tamén lle gusta patinar e os videoxogos. Con só 14 anos xa ilustrou o seu primeiro libro infantil


Cando Paula fala do seu estilo artístico di que lle encanta Van Gogh polos seus trazos e porque non emprega un realismo tan explícito como Rembrandt. Ten uns debuxos, di, máis do estilo de Andy Warhol, moi coloridos e cunha versión propia da realidade. Con só 14 anos, ademais dun evidente amor pola arte e uns coñecementos que se lle escapan á maioría de mozos da súa idade, esta vimiancesa (2005) vén de ilustrar o seu primeiro libro, Las aventuras de Manu y sus amigos, de Santiago Casal.

«Cando me chegaron os libros corrín abrilos á habitación. Collelo, darlle a volta e ver o meu nome aí, así como un anaquiño da miña biografía, foi algo incrible», relata Paula Pérez. Aínda non llelo contou a ningún mestre, pero si aos compañeiros. A reacción xeral, di, foi de sorpresa, pero tamén «se sentiron moi orgullosos».

A oportunidade veu da man da súa irmá maior, coñecida do autor. Tras ver os seus debuxos, propúxolle ilustrar un dos seus libros e así comezou todo: «Mandoume o texto, funo lendo e cada unha ou dúas páxinas ía debuxando algo. Estou moi acostumada porque fago, como mínimo, un debuxo ao día; e ademais xa teño ilustrado outros textos que ía lendo. Aínda así foi moi diferente, porque xa non eran bosquexos para min, senón pezas que ían saír publicadas», conta a moza.

Dende logo as artes son o camiño que escolleu de cara a construír unha carreira profesional futura, tanto no campo da ilustración de libros, como no deseño de imaxe corporativa ou na animación 3D: «Flípanme os videoxogos e encantaríame poder participar na creación dun», asevera, aínda que é consciente de que é un campo complicado e aínda en desenvolvemento. Non obstante, cre que aí está, precisamente, a clave: «Ao estar en crecemento creo que irá saíndo máis traballo e xurdindo máis oportunidades de formación, que por agora hai moi poucas», engade.

Paula, que debuxa dende que ten memoria e que sentiu verdadeira fascinación ao ver en vivo varias obras do seu admirado Van Gogh, tivo sempre o beneplácito familiar: «Mesmo se quixese ser astronauta creo que tamén me apoiarían. No que fose. Son os primeiros en animarme a seguir adiante», di esta moza vimiancesa.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

Paula Pérez: «Ver o meu nome no libro foi algo incrible»