Miguel Figueira: «Sigo coa ilusión do primeiro día intacta»

O adestrador do Bergantiños conta todo do novo proxecto para a próxima tempada


Carballo / La Voz

Non logrou o ascenso á Segunda B, pero si meter ó equipo no play-off (como subcampións) por terceira tempada consecutiva e pasar, por vez primeira, a eliminatoria inicial, así como gañar a primeira Copa Federación Española autonómica do club e pasar varias rondas na fase nacional. El é Miguel Figueira (1974) e seguirá conducindo ó Bergantiños cara o máis alto.

-O plantel está completo xa?

-Si. Estou moi satisfeito de que puidéramos pechalo antes de comezar a adestrar.

-A maiores da liga, que comezará o 25 de agosto, en que competicións participarán?

-Agora na pretempada temos a Copa Deputación, coma sempre. A única que non poderemos xogar é a Copa Federación Española ao clasificarnos para a Copa do Rei, que será sobre novembro-decembro. Fainos moita ilusión volver a estar nesta última grazas ao bo traballo realizado na pasada campaña. Sobre todo, porque nos poida tocar un equipo de Primeira ou Segunda División, a poder ser o Dépor. E despois, na liga, pensando sempre no pasiño a pasiño e en acadar os máximos obxectivos.

-Volve a ser o ascenso a meta principal?

-Este é o meu cuarto ano en Carballo e, como sempre digo, trátase de mellorar a campaña anterior, que é algo que vimos facendo ata agora; en facer mellores números e en quedar na mellor posición posible. Ó final o ascenso é ese obxectivo que todos temos en mente e do que cada vez estamos máis preto.

-Como ve a Terceira División deste ano co descenso do Fabril e do Rápido de Bouzas?

-Moi igualada e competida porque, ademais diso, tamén o Compostela se está reforzando moi ben; creo que o filial do Lugo, o Polvorín, vai ser un rival a ter en cont, ao igual que os dous Ourenses, o Arousa... Entre oito e dez equipos aspiran a estar entre os catro primeiros. Trataremos, coma o ano pasado, de sumar o máximo número de puntos posibles dende o principio, que nos dan esa tranquilidade para traballar durante o ano. Esperemos facer un bo bloque competitivo e que estea ó nivel.

-Neste sentido, houbo moitos cambios no plantel que vai haber que asimilar.

-Si. Buscamos mellorar aqueles aspectos que críamos que nos facían falta, sobre todo, en ataque, con xogadores con máis velocidade e capacidade, varios deles, para facer un número importante de goles, e démoslle continuidade a esa seriedade e traballo na liña defensiva e no medio campo. Creo que a directiva fixo un gran traballo, que se moveu moi rápido, pois houbo algunhas baixas que en principio non contábamos con elas, como a de Cañi, por motivos persoais. Traballou moi ben para esa idea que o corpo técnico temos en mente. Como adestrador, estou moi moi contento do esforzo que fixo o club e do plantel que temos configurado.

-Especifique un pouco máis sobre as fichaxes. Ata tres xogaron no Rápido de Bouzas a pasada tempada, algo que é curioso.

-Son xogadores que xa coñecía de Terceira División [por Duque e Yelco], novos, importantes, con ganas de facer as cousas ben e, sobre todo, con capacidade para mellorar, traballar e facer gol. Despois, están outras incorporacións como Bilal, que creo que é un chaval cun futuro importante; Remeseiro, a veteranía de Antonio, a volta de Iago [o terceiro que procede do Rápido] e a incorporación de Santi Canedo, que son moi boas a nivel individual. Despois haberá que axustalas dentro do colectivo, que é o máis importante.

-Con tres fases de ascenso disputadas, a nivel persoal, como se toma vostede a que será a súa cuarta tempada no club?

-Para min, cada campaña é coma se fose a primeira. Síntome moi agradecido á directiva, ó presidente, porque continúen confiando en min. O Bergan é o meu club, no que eu me criei como xogador e, a verdade, sigo coa ilusión do primeiro día intacta e coas ganas de defender o escudo. Nesta tempada non vale para nada todo o que fixeches antes, aínda que claro que se poden aproveitar certas cousas que se fixeron ben e mellorar as malas. -Non sinte presión por lograr dunha vez por todas o ascenso?

-Díxeno dende o primeiro día que cheguei e que era debutante en Terceira: que a presión que eu me esixía era meterme entre os catro primeiros. E dende o primeiro ano fómonos metendo aí. Creo que cada un ten que pelexar polo seu obxectivo. Eu pelexo cada ano por ser mellor adestrador e por facer mellor ao meu equipo. Non sinto máis nin menos presión. Sentiríaa se me deran un equipo importante como me están dando e non o metera no play-off de ascenso, polo menos. Non entendo o traballo do técnico estando relaxado.

-Vai notar o equipo a ausencia do capitán, Borja Facal?

-Evidentemente si. A súa baixa está por riba de calquera outra. Entendemos que é unha persoa moi importante no club, que ten un peso específico a niveis de coordinación e como adestrador e, como xogador, ninguén lle vai discutir o seu traballo. Só co tempo veremos se somos capaces de darlle ese perfil á banda dereita. Vai cambiar, non vai ser a mesma, pero non se lle pode esixir á xente que vaia xogar aí que sexa como Borja, porque coma el non hai ningún. Cada un debe ser como é e adaptaremos o equipo ás novas circunstancias.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Miguel Figueira: «Sigo coa ilusión do primeiro día intacta»