Un alumno da EFA Fonteboa gaña a terceira edición de Contos de Primavera

«Vicentiña, algún día serás coma min», de Enrique Fernández Chumma, obtivo a máxima puntuación


Carballo / La Voz

A terceira edición do certame literario Contos de Primavera, convocado por La Voz de Galicia e Radio Voz, co patrocinio do Grupo Calvo, xa ten gañador. É un alumno do centro de promoción rural EFA Fonteboa de Coristanco, Enrique Fernández Chumma, de 15 anos. O seu traballo Vicentiña, algún día serás coma min obtivo a máxima puntuación logo da suma de notas do xurado, integrado pola escritora e colaboradora de Radio Voz Belén Edreira; a técnica do Servizo de Normalización Lingüística de Ponteceso, Julia Ures; o delegado de La Voz de Galicia en Carballo, Xosé Ameixeiras, e as xornalistas Patricia Blanco e Verónica Couto.

«Era un 22 de xaneiro, día de San Vicente, seis da mañá, nunha parroquia de Coristanco chamada Centiña, famosa polas súas patacas e polos verdes campos. Estaba medio durmida, sentíame eu moi cómoda e quentiña, xa levaba aquí nove meses (...)»: así comeza o texto que se fixo co primeiro premio. Non lle andou moi lonxe Federico, o trasno de Touriñán, unha obra de Anxo Pose Baliña, estudante do colexio Manuela Rial Mouzo de Cee. Foi a que obtivo a segunda maior puntuación. A continuación, Lembranza, de Victoria Romar, tamén estudante no Manuela Rial.

Os autores destes tres contos levarán cadanseu agasallo e máis un diploma o día da entrega de premios, previsto para o sábado 11 de maio, na sala de Conservas Calvo. Tamén diploma se lles entregará aos seguintes sete textos que obtiveron a maior nota por parte do xurado, chegados algúns deles dos dous centros xa mencionados e tamén dende o IES Eduardo Pondal de Ponteceso.

A filosofía do certame

Contos de Primavera pretende seguir o camiño do xa lonxevo certame Contos de Nadal, este último dirixido a estudantes de primaria. A diferenza do de inverno, este concurso vai destinado a alumnos de secundaria de Bergantiños, Soneira e Fisterra. Aspectos históricos, paisaxísticos, etnográficos e patrimoniais habían de ser a temática, algo moi ben recollido polos estudantes: dende a riqueza da Costa da Morte ata o agro bergantiñán están presentes nos seus textos.

Os dez traballos seleccionados

  • Primeiro Premio. «Vicentiña, algún día serás coma min», de Enrique Fdez. Chumma (Fonteboa)
  • Segundo. «Federico, o trasno de Touriñán», de Anxo Pose Baliña (colexio Manuela Rial Mouzo)
  • Terceiro. «Lembranza», de Victoria Romar (colexio Manuela Rial Mouzo)
  • Cuarto. «Carballeira recupera a súa identidade», de Alejandro Varela Dovale (Fonteboa)
  • Quinto. «Un verso solto no facho», de Carlota Atán Ares (Manuela Rial Mouzo).
  • Sexto. «Unha saída diferente», de Alba Agrelo Gil (Instituto Eduardo Pondal).
  • Sétimo. «A fin do mundo», de Marta Vérez Pequeño (Manuela Rial Mouzo).
  • Oitavo. «Habelas, hainas», de Adriana Castiñeira Iglesias (Manuela Rial Mouzo)
  • Noveno. «Mestixaxe», de Hadrián Félix Neira Varela (IES Eduardo Pondal).
  • Décimo. «O misterio da casa abandonada», de José Regueira Santos (EFA Fonteboa).

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
7 votos
Comentarios

Un alumno da EFA Fonteboa gaña a terceira edición de Contos de Primavera