Parques eólicos e xustiza enerxética


Os ingresos anuais que reciben os Concellos galegos pola existencia de parques eólicos no seu territorio proceden dos impostos (Bens Inmobles e Actividades Económicas) e da súa participación no Fondo de Compensación Ambiental (FCA). A contía que reciben é función do nivel de produción, no primeiro caso, e do impacto paisaxístico (medido segundo o número de aeroxeradores e a lonxitude das liñas de evacuación) no caso de FCA. Aínda sendo necesarios estudos que o analicen con maior profundidade, aparentemente eses ingresos só conseguiron transformar a política municipal no caso de poucos Concellos, naqueles onde se concentra un alto número de parques eólicos e aeroxeradores, como pode ser o caso de Muras e Ourol.

Crecer por acumulación de aeroxeradores e parques non debería ser o modelo. O repotenciamento de parques eólicos, para os Concellos, poderá ter dous efectos contrapostos: incrementar o valor dos inmobles e o volume da produción, debido á maior eficiencia dos novos parques eólicos (a nova tecnoloxía é máis eficiente), o que provocará maiores ingresos. Contariamente, a redución do número de aeroxeradores e liñas, reducindo o impacto territorial (debido á menor plena ocupación de terras) e incrementando o impacto paisaxístico (debido á súa maior altura serán percibidos desde maiores distancias) provocará menores ingresos derivados do FCA.

O cambio de modelo enerxético debería realizarse con maiores doses de xustiza enerxética: maior participación pública e capacidade de decisión nos procedementos de designación dos lugares aptos; recoñecemento do papel das comunidades locais, sempre rurais, asignándolles un papel activo; apertura, e impulso, da participación desas comunidades (e tamén dos concellos) na promoción de investimentos renovábeis e eólicos, e un reparto máis xusto do negocio xerado. Nada disto se contempla no modelo vixente. A clave non se vincula só co número de aeroxeradores. A clave é producir enerxía limpa con moita maior equidade.

Xabier Simón Fernández.Observatorio Eólico de Galicia (Universidade de Vigo). 

Por Xabier Simón Fernández Observatorio Eólico de Galicia (Univ. Vigo)

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Parques eólicos e xustiza enerxética