«E veña subir impostos, esta cousa non se anima, vamos ir en bicicleta cando suba a gasolina»

A regueifa da semana, por Lupe Blanco


Moi bos días para todos

que eu agora non resollo

sonche días de calor

que disque chega o veroño

Unha cousa xa vos digo

que eu con isto non aposto

creo que o mes de setembro

vai ser mellor que o de agosto

Se andades por Carballo

que é domingo de feira

están coas gangas os comercios

para que alí vaia quen queira

Están na fin de semana

e o domingo ata que peche

o que non estree nada

ha de ser porque non quere

Polo menos temos gangas

sei que non as ten calquera

como lle pasa á xentiña

que colle o bus en Fisterra

Parece que a cousa é grave

para o que ande en autobús

xa se están equiparando

como o recibo da luz

Xa o están inspeccionando

non sei quen terá a culpa

pero dóbranche o recibo

se o colles en hora punta

E veña subir impostos

esta cousa non se anima

vamos ir en bicicleta

cando suba a gasolina

Deixemos o conto aparte

a ver se marcha o problema

que estivo a Paris de Noia

na festa de Santa Eufemia

Moito traballan por Rus

sen esforzo non se logra

se se poñen motivados

aínda traen á Pantoja

Aproveita o domingo

fai o que che dea a gana

que mañá é laborable

e vainos tocar diana

Vamos dar a despedida

mando un abrazo forte

de parte da regueifeira

que haxa saúde e sorte.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos
Comentarios

«E veña subir impostos, esta cousa non se anima, vamos ir en bicicleta cando suba a gasolina»