Héctor Quiroga, as raíces da investigación oceanográfica

OBITUARIO | Héctor Quiroga Lorenzo (A Coruña, 1933), científico


Cando eu me incorporei á plantilla do laboratorio da Coruña do Instituto Español de Oceanografía (IEO) en 1980, España aínda non estaba na CEE. Corrían tempos heroicos e o país levaba meses con ansias por formar parte do club selecto europeo. Estabamos en setembro e había que perfilar moitas estatísticas para certificar a incorporación definitiva (1986). Lembro que Héctor Quiroga ocupaba un despacho no primeiro andar, que compartía con outros dous investigadores dedicados a avaliar as poboacións de moluscos bivalvos do maior banco de Galicia, o da A Misela, na ría de Muros e Noia. Previamente, participara no desenvolvemento do Plan Marisqueiro de Galicia, sendo tamén asesor da comisión para a revisión dos polígonos de viveiros flotantes. Colaborou no plan pesqueiro de Galicia.

Quiroga foi un dos artífices da construción do actual laboratorio, situado no dique de abrigo, inaugurado en 1974, e dirixido ata 1981 por Miguel Torre Cervigón. Con anterioridade, fora o director do Centro Costeiro do Noroeste, ubicado no primeiro piso dun vello barracón no peirao de Linares Rivas que, a súa vez, albergaba a Comisaría do Porto e o Corpo de Carabineiros da Garda Civil. Previamente, realizara estudos de investigación en Francia, Gran Bretaña e Estados Unidos, publicando numerosos artigos de divulgación en prensa e revistas especializadas.

Entre 1987 e 1989 promoveu campañas de avistamento de mamíferos mariños no Atlántico nordeste, a bordo dos buques Explorador e Investigador. No 2002, editado pola Deputación, publicou o libro La caza de ballenas en aguas ibéricas, onde recompila a información. Pero Quiroga era un personaxe dual e complexo; por un lado, estaba o investigador apaixonado; por outro, o político atento e pendente a todo o que ocorría na súa cidade, A Coruña. En 1985, abandona o IEO para incorporarse á dirección provincial do Ministerio de Agricultura, Pesca e Alimentación, como xefe da sección de Pesca, pasando en 1988 á Dirección Territorial de Galicia, órgano no que permanecería ata a súa xubilación, no ano 2000. Que a terra lle sexa leve.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Héctor Quiroga, as raíces da investigación oceanográfica