«O bosque e o agro cultivados son garantía ambiental»

Francisco Dans vén de participar nunha xornada de consenso para o sector forestal de Galicia

p. vázquez
carballo / la voz

Francisco Dans é o director da Asociación Forestal de Galicia, desde onde hai xa varios meses traballan para reclamar máis atención para o sector. Esta semana pasou polos micrófonos de Radio Voz.

-Cantos anos levan traballando nesta asociación?

-Levamos traballando máis de trinta anos desde a nosa constitución. Facémolo cos nosos socios, que son propietarios forestais particulares e de comunidades de montes veciñais.

-Están espallados por toda Galicia?

-Efectivamente. Estamos esparexidos por 300 concellos de toda Galicia.

-A Cidade da Cultura de Santiago de Compostela acollía hai un par de semanas unha xornada de presentación para propostas de consenso para o sector forestal de Galicia. A implicación da súa asociación foi máxima, non?

-Desde o comezo destas reunións, estamos apoiando o seu desenvolvemento porque cremos que é fundamental explicar a nosa actividade e a nosa implicación coa sociedade galega, que é total. Pensamos, tamén, que este falso encontro da produción forestal, como a da produción agraria en xeral, co medio ambiente, non é verdade. Todo o contrario, o bosque e mais o agro cultivados son a mellor garantía para que o noso medio ambiente siga mantendo uns niveis de calidade altos, e seguir mellorándoo cada día un pouco máis.

-É precisa moita pedagoxía?

-Cada vez máis, porque entidades coma a nosa son mal entendidas e comprendidas e, ás veces, isto soluciónase cunhas conversas tranquilas, sen ningunha crispación. É preciso que cada un entenda o que o outro fai para que non haxa malentendidos.

-Precisamente nesas xornadas estaban representados todos os sectores, con partidos e asociacións de todo tipo. Pódese dicir que este é un documento de consenso?

-Si. Estivemos traballando organizacións agrarias, forestais, sociais, culturais e medio ambientais para tratar de poñernos de acordo no básico. Penso que este documento é unha base de partida para entender o que está sucedendo no medio rural galego.

«O principal problema está no monte arborado sen xestión»

-Vostede mesmo fixo unha presentación sobre os principios clave para o desenvolvemento do monte e das actividades económicas asociadas. O propio título dá pistas...

-Se non hai actividades económicas asociadas non hai sostibilidade. De non ser así, os recursos perderíanse, o agro abandónase e aparecería a «selvatización», así como o desastre e o incendio forestal. Mentres que se hai actividades de carácter económico, tal e como as concibimos hoxe, estamos asegurando o noso patrimonio de cara ao futuro e xerando ao mesmo tempo emprego no medio rural e sostibilidade. É pura lóxica.

-En Galicia temos un 41 % de espazo de bosque arborado sen xestión. Isto é algo sanguento...

-Ecoloxicamente poderiamos falar dun territorio no que a vexetación evoluciona de forma espontánea. Nestes ecosistemas é moi difícil intervir e xerar economía. Pensemos, por exemplo, nos cumios dos montes ou nas partes máis altas do territorio. Alí non está o problema, senón no monte arborado sen xestión, que alcanza case o 20 %, uns datos que nós mesmos elaboramos cada ano, xa que non existen estatísticas oficiais referentes a estes temas. O máis importante é esa parte do noso territorio que está sen xestión.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

«O bosque e o agro cultivados son garantía ambiental»