Paula Carballeira animou aos rapaces a xogar coas palabras

Hoxe haberá dous obradoiros coa contacontos e unha sesión para mestres con Manuel Ferreiro


Paula Carballeira tomou onte o relevo de María Lires para volver a adornar con poesía o dolmen de Dombate convidando aos nenos a deixarse conquistar pola maxia dos versos. A contacontos e actriz fíxoo coa axuda do seu libro Nunca mascotas (Galaxia), unha obra coa que pretende concienciar sobre o respecto aos animais. E así, falando de animais e facendo xogos sobre eles, avanzaron as dúas sesións que Carballeira ofreceu para os alumnos de primeiro e segundo da ESO do CPI As Revoltas.

Os rapaces tiveron tamén ocasión de emular á Carballeira poeta escribindo os seus propios versos: «Ao principio estaban preocupados pola rima, aínda que tamén había algún que dicía que se podía facer rima libre», explicou a contacontos ao remate dunha xornada que cualificou de proveitosa. «Nos meus espectáculos de contacontos tamén trato de interactuar co público, pero nos obradoiros hai diálogo e iso é algo que me resulta moi interesante».

Carballeira tamén salientou a boa resposta dos rapaces. «A eles gústalles ver que valoras o que fan, que poden escribir, que só teñen que animarse. E iso é foi o interesante deste tipo de xornadas: que eles fagan, experimenten e xoguen coas palabras».

Hoxe seguirá traballando nesa liña posto que regresará a Dombate para ofrecer dous novos obradoiros para os escolares de As Revoltas: será a quenda dos alumnos de terceiro (10 horas) e de cuarto (11) da ESO.

Xornadas do profesorado

Ademais, durante a xornada de hoxe reanudaranse as actividades das xornadas para o profesorado incluídas tamén no ciclo Dombate Primavera da Poesía. O convidado desta sesión será o filólogo Manuel Ferreiro, un dos principais especialistas na obra de Eduardo Pondal, que se encargará de analizar o poema O dolmen de Dombate. Comezará ás 18 horas e como nas xornadas anteriores a presentadora será a escritora ceense María Canosa.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Paula Carballeira animou aos rapaces a xogar coas palabras