«O peche do restaurante A Estación foi unha decisión que tomamos os dous»

Xunto co cercedense Juan Crujeiras, rexentaba o establecemento en Cambre, cunha estrella Michelin


a coruña / La voz

Con gran axilidade, Beatriz Sotelo vai enchendo as cuncas co xeado de crema inglesa e fariña que presentou a EFA Piñeiral, da que é mestra, no Fórum Gastronómico de A Coruña. Polo de agora, Sotelo aínda pode presumir de ter unha estrela michelín, pero o repentino anuncio do peche do restaurante A Estación de Cambre fará que o ano que vén a comarca da Coruña perda -salvo sorpresa- un destes prestixiosos distintivos. Pese a que Juan Crujeiras falou en singular para referirse ao cese do negocio, Sotelo prefire adoptar o plural e di que o decidiron «entre os dous». Beatriz, casada co baiés Braulio García, profesor no Centro Superior de Hostalería de Galicia, está tamén ligada á Costa da Morte.

-¿Que lle está parecendo o Fórum?

-Considero que é unha forma de xuntar á xente do gremio. Hai moito profesional, polo que puiden ver estes días. Hai bastantes rapaces das escolas tamén, que penso que teñen que vir para coñecer como é este mundo. Tamén está a haber moita afluencia de xente.

-O Grupo Nove foi un dos protagonistas do luns, precisamente.

-É moi emocionante. Somos un grupo que leva 14 anos e estás, a través dun vídeo, explicando o que es. Non só somos cociñeiros, somos amigos e iso é o que implica unha cociña.

-¿Que proxectos ten en mente tras o peche da Estación?

-O peche da Estación foi unha decisión persoal. Somos dous socios e decidímolo entre os dous. Polo de agora, eu non teño nada pechado, pese a ter varios proxectos abertos. Quero descansar un pouco porque xa levo moita guerra enriba e poder dedicarlle tempo á familia.

-¿Foi meditado ou repentino o peche da Estación?

-Eu non pensei que foramos a pechar. Pero ningún dos dous se decidiu a quedar con ela, así que o mellor era empezar unha nova etapa. É unha mágoa; sobre todo polo equipo. O restaurante funcionaba de marabilla, pero foi unha decisión nosa.

-¿Pode afectar ao Grupo Nove, onde tamén son compañeiros?

-A relación entre nós vai seguir sendo de cociñeiros. Non ten porque haber ningún malentendido.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

«O peche do restaurante A Estación foi unha decisión que tomamos os dous»