Empresarios e expertos debaterán durante dous días sobre a presenza da lingua no eido socioeconómico
06 jul 2016 . Actualizado a las 05:00 h.Durante dúas xornadas -as de hoxe e mañá- Carballo convertirase no principal foro de reflexión sobre a situación da lingua galega a través do curso monográfico de verán que desde hai 12 anos (os últimos 9 na capital bergantiñá) analiza a saúde do idioma e procura fórmulas para mellorala.
Este ano, a cuestión central será a súa presenza no eido socioeconómico, e para avaliala a Universidade da Coruña, o Concello, a Coordinadora de Traballadores de Normalización Lingüística e a Xunta, buscaron a axuda dunha extensa nómina de expertos e de empresarios que poderán relatar en primeira persoa a súa propia experiencia. Charlas, mesas redondas e mesmo unha visita guiada por Carballo iranse sucedendo entre hoxe e mañá.
10.00
Inauguración
Na sesión inaugural que terá lugar no Fórum tomarán a palabra a presidenta da CTNL, Anxos Sobriño; o secretario xeral de Política Lingüística, Valentín García; o reitor da UdC, Julio Abalde, e o alcalde carballés, Evencio Ferrero.
10.30
Plan de dinamización
Valentín García presentará o Plan de dinamización da lingua galega no tecido económico 2015-2020.
12.00
Valor de identificación
O papel da lingua como valor positivo de identificación empresarial é o tema da intervención de Antonio Dieter Moure, presidente da Confederación de Empresarios de Galicia.
12.45
Experiencias empresariais
Malú Bergantiños (responsable de comunicación de R), Pedro González (voceiro de Deleite) e José Manuel Naya (responsable de Todo Lar) compartirán as súas experiencias do uso do galego como valor engadido.
16.30
O investimento lingüístico
Fernando Ramallo, profesor da Universidade de Vigo, falará dos espazos do galego no eido socioeconómico e do investimento lingüístico como forma de capitalización.
17.30
O Foro Peinador
Xosé González, voceiro do Foro Peinador, explicará o papel da entidade no fomento do galego nas empresas.
18.45
O galego na publicidade
Chechu Pérez, do departamento de Comunicación Audiovisual e Publicidade da Universidade de Vigo ocuparase do galego na publicidade.
19.45
Dignificación do propio
A artesá e empresaria Elena Ferro, responsable de Eferro Zocos, pechará a primeira xornada falando da dignificación e posta en valor do propio.