A escritora ceense María Canosa é homenaxeada na Biblioteca de Muxía este mes de agosto coa dedicación da Galería de Mulleres
06 ago 2014 . Actualizado a las 07:00 h.«É un orgullo que se acordasen de min e sobre todo que teñan ese espazo dedicado á muller». María Canosa é a homenaxeada na Galería de Mulleres da Biblioteca Municipal de Muxía neste mes de agosto. A televisiva escritora de Lires temía o cuestionario, pero saíu ben do paso.
-¿Quen foi Ramón Caamaño?
-Esa seina. Foi o fotógrafo que máis e mellor abalou a Pedra de Muxía.
-¿Verbena ou foliada?
-Facédesme elixir entre cada cousa... Cando se trata de festas eu non elixo. ¡Todo!
-¿A que dolmen lle chaman a catedral do megalítico?
-Supoño que ao de Dombate.
-¿Cal é o último faro que se construíu en Galicia?
-O último que coñezo é o de Nariga.
-¿Cal foi a última vez que puxo unha lavadora?
-Non o lembro porque o fago continuamente. Hai unhas horas.
-¿Cal é o punto máis occidental de Galicia?
-Mira, que se pelexen Fisterra e Muxía. Eu non quero leas, metro arriba, metro abaixo. Que decidan eles ou Jorge Mira que o sabe moi ben.
-¿Un defecto?
-Ultimamente, demasiada naturalidade.
-¿De que castelo foi dono Rui Soga Mariño de Lobeira?
-Non son moi boa en historia. Lobeira, ao único que me soa é ás Illas Lobeiras. E creo que alí non houbo ningún castelo.
-¿Que poeta andaluz lle dedicou un poema en galego á Barca?
-Creo que foi García Lorca.
-¿En que che gusta pasar o tempo das vacacións?
-Ultimamente xa non sei nin o que son. Pero gústame dedicarme a todo iso que non puiden facer antes. Viaxar, ler, visitar á familia...
-¿Cantos anos ten Avelina Mouzo, a avoa da Costa da Morte?
-Exactamente non o sei. Unha presada máis de cen ten.
-¿Un soño por cumprir?
-Aprendín que os soños é mellor non contalos porque a maior parte das veces escachan.
-¿Onde está o pazo de Romelle?
-En Zas, ¿pode ser?
-¿Praia téxtil ou nudista?
-Téxtil sempre. Non sería capaz de ir a unha nudista.
-¿Onde naceu o almirante Mourelle?
-¿Corme? ¿Camariñas?
-¿Licor café ou caipirinha?
-Licor café por enxebre, pero non bebo ningún dos dous.
-¿Onde prefire rematar o Camiño? ¿En Fisterra ou en Muxía?
-¡Mira que vos gustan as leas! Antes fuxín e agora non podo. Pois, a ver, os Canosa procedemos de Fisterra. Así que en Fisterra.