Cambio de hora


Coma tódolos anos, cando acaba marzo, a hora cambia. Este domingo terá unha hora menos, pero xa cearemos co Sol aínda no ceo. Medran os días e minguan as noites. E así será a partir de agora ata xuño, cando teñamos o privilexio de ser o último lugar de Europa -o cabo Touriñán- que ve ao astro rei afundíndose no mar. O privilexio de ter luz natural ata as once da noite, por moito fuso horario que intenten cambiar. Que máis dará erguerse aínda de noite.

Porque o día e a noite son cousas dos astros, pero os fusos horarios son cousas dos homes. E hoxe en día miramos pouco cara os astros. E nótase. Podiamos ler o domingo nestas páxinas que algúns reloxos dos Concellos, os públicos, é dicir, os de todos, non funcionan como deberían. Algúns son moi fermosos, pero non dan a hora correcta. Outros son máis normaliños pero marcan o tempo como se lles pide. E hainos que non teñen nin agullas. Nos consistorios, ao mirar de portas para a dentro, a cousa é bastante parecida. Uns de moita foto e moita pompa, pero pouca efectividade. Tamén os hai calados, discretos, pero que traballan polo ben común e cumpren co encargo que lle fixeron os veciños. Os menos, por sorte, andan sen timón, a mercé do vento que sopre.

A partir de agora, nos Concellos e na rúa, moitos vanlle a dar corda aos reloxos para facer nun ano o que non puideron, ou quixeron, nos tres anteriores. Rúas que levan doce anos a medio pintar remátanse nun par de días, os proxectos cheos de po resucitan do fondo dos caixóns, os días quédanse curtos para as axendas e os bica-máns e os plenos que onte eran auténticos compadreos convértense, da noite para a mañá, en campos de batalla por unha puñada de votos. A boa hora.

Os que viven a longo prazo e non de catro en catro anos ven como se lles escapa o tempo. O Concello máis grande da Costa da Morte é o da emigración que ten que buscar o sustento lonxe da casa. Porque aquí, aínda que o reloxo pareza parado, o certo é que, con este panorama, temos as horas contadas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos

Cambio de hora