«É moi emocionante facer un libro que fale da túa terra»

El autor de «Fisterra» presentará su nueva obra en Semana Santa

Modesto Fraga afirma que para el «Fisterra é un sentimento» máis que un lugar de orixe.
Modesto Fraga afirma que para el «Fisterra é un sentimento» máis que un lugar de orixe.

«Vir ao mundo en Fisterra non é comparable a nacer noutro lugar. É coma ser o único espermatozoide que chega ao óvulo, pero por partida dobre». Quen fai esta comparación é Modesto Fraga, escritor e, actualmente, tamén libreiro, nacido no que durante tanto tempo foi o límite do mundo coñecido. E que mellor xeito de render tributo ao lugar cun libro. Fisterra, a derradeira perla de occidente é a obra coa que Fraga se mergulla na prosa despois dunha traxectoria ligada case sempre á poesía. «Era unha tarefa pendente, xa que pouco máis fixera que algún relato curto. Creo que ao final resultou un libro útil e divulgativo que vai axudar a comprender un pouco máis Fisterra», afirma. Un traballo que «é unha mestura de ensaio, guía turística, biografías e moitos outros xéneros», segundo explica.

Hai historias sobre personaxes coma o capitán Traba, poeta e mariñeiro, ou as de Jurjo e Chanquete, os dous fisterráns que lle puxeron cara á emigración na mítica fotografía de Manuel Ferrol. Ou unha detallada descrición das particularidades da fala fisterrá coma o enxordecemento (palancre, lonqueirón).

«É bo escribir para dentro»

«Pretendo recoller o que somos nós. É bo escribir de nós, cara adentro, e non só de Fisterra cara o resto do mundo», explica o autor. «O mundo falou de nós dende a Antigüidade. Xente coma Ptolomeo ou Plinio xa percibía que aquí había algo especial», lembra. Aínda que a obra xa está lista, Modesto Fraga quere agardar á Semana Santa (19 de abril) para presentala na súa vila natal. «Vou agardar á presentación para comezar a distribuíla, pero hai moita xente que xa me está pedindo exemplares». Estes días, non deixa de asinar e enviar os primeiros volumes aos amigos.

Este libro non é o único que Fraga terá nas librarías nas vindeiras datas. Está tamén a punto de publicarse o libro que recompila os poemas gañadores do certame sobre os faros da Costa da Morte, no que o fisterrán acadou o primeiro premio.

Todo isto sen descoidar a súa libraría, Á lus do candil, que abriu en xuño de 2012 en Arteixo. Unha aposta por unha libraría próxima ao público. «Hoxe non podes limitarte a ter os libros colocados nos estantes. Hai que traer á xente», afirma Fraga.

Con este novo traballo, a faceta creativa quedou un pouco aparcada. «Creo que a produción literaria ten que ir con calma, e agora non teño o tempo suficiente», conclúe.

Con corenta anos recén cumpridos (o 27 de febreiro), Modesto Fraga xa ten ás súas espaldas numerosos recoñecementos en forma de premios como o Avelina Valladares, Rosalía de Castro, Francisco Añón, Fernández del Riego ou o Ramón Cabanillas. Con só 23 anos publicou Do amor salgado, o seu primeiro poemario.

Ademais dos libros, a unión de Modesto á súa terra tamén se trasladou á vida política. Nas eleccións municipais do ano 2011, presentouse como candidato á alcaldía polo BNG e acadou o mellor resultado da historia para a formación nacionalista na súa vila. Durante nove meses, entre febreiro e novembro de 2012, ocupou tamén o cargo de responsable e voceiro do partido na Costa da Morte. «Da política quédome con dúas vertentes. Unha, ilusionante, por intentar, na medida do posible, buscar o mellor para Fisterra, que ten unhas potencialidades enormes e que, ao meu xuízo, non están ben explotadas. Pero tamén me levei decepcións, con obstáculos internos que non benefician a ninguén», lembra.

«De vez en cando hai que soltar lastre, e eu tomei a decisión de deixalo», explica Modesto Fraga en referencia a esa etapa. «En tódalas cousas hai que sacar a lectura positiva».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
12 votos

«É moi emocionante facer un libro que fale da túa terra»