Lumieira dedica unha xornada á cultura local e a Rosalía

carballo / la voz < / span>

CARBALLO

09 feb 2014 . Actualizado a las 07:00 h.

A recuperación da cultura local e familiar e a obra e o papel didáctico da figura de Rosalía son os dous eixos das actividades programadas para a tarde do mércores en Carballo pola asociación cultural Lumieira.

Os actos, que se desenvolverán no Pazo da Cultura, darán comezo ás 17.00 horas cunha charla na que a profesora, investigadora e consultora brasileira Tânia Braga falará da cultura local, dos arquivos familiares e da produción de materiais didácticos poñendo como exemplo o traballo do proxecto internacional Recriando historias.

A continuación (19.30 horas), farase unha presentación do monográfico que a asociación Nova Escola Galega lle dedicou a Rosalía de Castro a través da súa Revista Galega de Educación. Neste caso, os participantes serán Mercedes Queixas, coordinadora dese volume; Suso Rodríguez, director da publicación, e Rosalía Fernández Rial, autora dalgúns dos seus contidos e presidenta de Lumieira.