Os responsables da Fundación Gonzalo López Abente desprazaranse este xoves ata A Coruña para dar a coñecer ao público herculino Poesía completa, o volume editado pola entidade coa colaboración de Espiral Maior que, como o seu propio nome indica, recolle a totalidade da produción poética do autor muxián.
O espazo cultural Portas Ártabras, da Asociación Amigos dos Museos de Galicia, acollerá este acto (programado para as 20.00 horas), no que participarán o vicepresidente da fundación, Xosé Henrique Rivadulla Corcón; o director de Espiral Maior, Miguel Anxo Fernán Vello; o responsable da edición literaria do volume, o poeta ceense Miro Villar, e o director de La Voz de Galicia, o muxián Xosé Luís Vilela.
Esta presentación dá continuidade á celebrada o pasado mes de xullo en Muxía coincidindo cos actos do 50 aniversario do pasamento de López Abente.
Esta Poesía completa recolle os cinco libros editados en vida do poeta -Escumas da ribeira, Alento da raza, D?outono, Nemancos e Centileos nas ondas-, tres que foron publicados tras o seu falecemento -Bretemada, Decrúa e Monza de frores bravas para Nosa Señora da Barca- e varios poemas aparecidos en revistas e xornais.