Un poemario «moi social» gaña o primeiro Premio Gonzalo López Abente

Daniel Salgado recollerá o galardón o día 20, durante o recordo do 50.º aniversario da morte do autor muxián

la voz

Non foi doado, pero o xurado da primeira edición do Premio de Poesía Gonzalo López Abente, composto polos escritores Marilar Aleixandre, Miro Villar e Xosé Henrique Rivadulla Corcón, xa ten gañador. Os tempos sombrizos (diario), do lucense Daniel Salgado (Monterroso, 1981), acadou o galardón por unanimidade, impoñéndose aos outros 53 orixinais procedentes de toda Galicia. «Temos a sorte de que temos unha comunidade de poetas importante e relevante, así que houbo moita participación e moita calidade», explicaba onte Rivadulla Corcón, quen destacou que a obra, premiada con 2.000 euros, será publicada por Edicións Xerais.

O xurado salientou que o poemario de Daniel Salgado, licenciado en Ciencias da Comunicación e doutorado en Filoloxía Galega, amosa un gran compromiso con Galicia. «O primeiro que nos chamou a atención foi a estrutura do libro, que, como indica no título, é como un diario no que alguén relata a súa experiencia. É unha experiencia moi social e solidaria co entorno, é unha obra cun claro compromiso anticapitalista, cunha forte carga ideolóxica a favor da liberdade e da xustiza social», explicou Rivadulla Corcón.

O fallo do xurado tamén resalta que o traballo de Daniel Salgado «presenta unha rica intertextualidade coa poesía e a música contemporáneas, o jazz nomeadamente, e con poemas de forte contido metaliterario».

Salgado, autor de Sucede, Días no imperio ou Ruído de fondo, entre outros libros, recibirá o seu premio o vindeiro día 20, nun acto que se celebrará en Muxía para recordar o 50.º aniversario da morte de Gonzalo López Abente. Nesa xornada, entre outras actividades, destaca unha conferencia sobre a obra do autor muxián que impartirá Xosé Luís Méndez Ferrín, e a presentación da edición da Obra Poética Completa de López Abente, preparada por Miro Villar e editada por Espiral Maior.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos

Un poemario «moi social» gaña o primeiro Premio Gonzalo López Abente