Mostras de amor polo propio

Máis de 300 bailaríns de 12 asociacións de toda a provincia bailaron ao unísono en Carballo a muiñeira «Buxos Verdes»

Grupos de toda a provincia participaron no Día da Muiñeira organizado por Nemeth.
Grupos de toda a provincia participaron no Día da Muiñeira organizado por Nemeth.

Impresiona ver a máis de 300 bailaríns interpretando ao mesmo tempo unha mesma peza. Impresiona tanto que non é de estrañar que os aplausos soasen atronadores cando os participantes na 32.ª edición do Día da Muiñeira de Carballo remataron de bailar ao unísono a muiñeira Buxos Verdes, que tocaron con mestría os integrantes da banda de gaitas Lembranzas de Bergantiños. Aplausos para pequenos e maiores que se achegaron ata a praza do Concello carballés para ofrecer, un ano máis, unha auténtica mostra de amor polo propio. Unha mostra algo máis sacrificada este ano, xa que a calor, por fin presente, fixo que a máis dun lle sobrasen os pololos, o dengue ou o mandil.

Impresionou a primeira vez que os mozas e mozos comezaron a moverse ao ritmo de Buxos Verdes, e tamén a segunda, incluso a terceira, porque os máis de 300 bailaríns, pertencentes a 12 asociacións da provincia e divididos en 29 grupos, bailaron tres veces a mesma peza, composta en 1951 polo gaiteiro arzuano Basilio Carril Fernández. Tres veces a mesma muiñeira, pero cada un dos grupos ofreceu a súa particular versión do tema. Así, mentres que os máis pequerrechos daban voltas e tocaban as palmas tratando de seguir o ritmo, outros, máis adiantados atrevíanse xa co punta-tacón, ao tempo que os maiores sorprendían ao público con voltas e reviravoltas. Dúas ducias de versións distintas que o numeroso público concentrado na praza do Concello agradeceu con aplausos e algún que outro aturuxo de ánimo, e que os organizadores, a asociación cultural Nemeth recoñeceu cunha fermosa placa elaborada por oleiros de Buño. Houbo para San Campio de Cances, San Xoán de Xornes, O Candil de Sísamo, Arume de Berdillo, San Martín de Razo, San Martiño de Cambre (Malpica), Terra de Sena (Cee), Xiradela (Arteixo), Xacarandaina (A Coruña), Folliñas e Semente Nova (Oleiros), e tamén para os gaiteiros, para Antonio Porteiro, e para os voluntarios de Protección Civil, que onte traballaron a reo.

día da muiñeira

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos

Mostras de amor polo propio