«As rapazas cada vez teñen máis interese pola literatura, pero eles perden moito tempo co fútbol»
CARBALLO
A Semana das Letras, das Artes e da Música do IES Alfredo Brañas súmase hoxe ao Día do Libro coa visita do escritor Xavier Alcalá (Miguelturra, Cidade Real, 1947), que ofrecerá unha charla sobre a transición da literatura tradicional á dixital.
-¿En que momento se atopa esa transición?
-Estamos nunha etapa de transición na que non vai desaparecer o formato tradicional, pero tampouco vai aguantar eternamente. Esta transición leva a un fenómeno novo que é que se edite primeiramente en formato dixital para despois facelo en papel baixo demanda. Iso é o que está a pasar no mundo, que vai primando o dixital, e tarde ou cedo vainos chegar aquí tamén.
-¿É dos que aceptan ben a transición ou dos que se resisten a ela?
-Eu, por razóns de mentalidade e de formación, son partidario de que a transición se vaia producindo porque os novos formatos permiten non só ler o que é o texto, senón traballar con texto e con hipertexto [palabras ou frases marcadas dentro dun documento que permite acceder a outros documentos e contidos relacionados]. O texto nunca vai desaparecer, pero o seu soporte pode ir cambiando.
-O cambio tecnolóxico tamén abriu a porta á autoedición dixital. ¿Como se ve isto desde a perspectiva dun autor?
-Ese fenómeno avanzou moito, pero xa se está producindo un contra fenómeno. Calquera pode publicar o que queira e poñelo na web, pero como non pasa previamente o filtro da edición aparece moito material que non ten calidade. Por iso agora todas as editoriais que están postas ao día están publicando en formato dixital e non é o mesmo ler un título que ten un selo dun editor que outro que non o ten, pero tampouco é o mesmo pagar vinte euros ou un ou dous.
-¿Xa se rendeu tamén ao auxe dos ebook?
-Non. Eu o que teño é un ordenador destes que se lles separa a pantalla e leo nela, é moi cómoda.
-¿Nas súas visitas a centros, como a de hoxe, como ve o interese dos rapaces pola literatura?
-Eu o que teño que dicir é que as rapazas teñen cada vez máis interese, pero os rapaces perden moito tempo co fútbol. Sempre houbo lectores e lectoras, pero cada vez é máis manifesto este fenómeno, este é un mundo que vai derivando cara as mulleres.
-¿Isto reflíctese tamén nun aumento do número de autoras?
-Cada vez hai máis, pero con todo, e falo por experiencia propia por ser xurado de concursos, que seguen sendo minoritarias.