O proxecto «Titania» arranca en Balarés para formar a un milleiro de alumnos

Xosé Ameixeiras Lavandeira
X. Ameixeiras CARBALLO / LA VOZ

CARBALLO

JOSE MANUEL CASAL

As fundacións Pondal e Barrié implican a un cento de profesores

01 mar 2013 . Actualizado a las 07:00 h.

Coa mirada fronte ao vello xacemento mineral de Balarés (Ponteceso) tivo lugar onte a presentación de Titania, conciencia do noso pasado, un proxecto da Fundación Pondal amparado pola Fundación Barrié por medio do programa EducaBarrié que beneficiará a máis dun milleiro de alumnos de Bergantiños. Os protagonistas desta iniciativa puideron verse as caras para en abril por en marcha as actividades, nas que colaboran un cento de profesores.

O alcalde pontecesán, José Luis Fondo, foi o anfitrión dos colaboradores, aos que se dirixiu a continuación o director da Fundación Barrié, Javier López Martínez, un vello coñecido da bisbarra porque foi o primeiro técnico de Neria. López Martínez loou a implicación dos profesionais do ensino, a fermosura do espazo do encontro e máis a figura de Isidro Parga Pondal (impulsor de Titania), un científico «humanista» que se «implicaba na economía do seu país», no que deixou «tanta pegada».

Tamén falou a asesora de EducaBarrié, a corcubionesa Susana Vázquez, que falou dos recursos para desenvolver o programa, que inclúe visitas ao que foi enclave mineiro de Balarés e a outros lugares unidos a Parga Pondal e ó poeta Eduardo Pondal, as Cerámicas Castro e o Laboratorio Xeolóxico de Laxe, así como obradoiros, conferencias e tarefas didácticas a cargo de recoñecidos científicos, covas célticas e unha máster class. Persoeiros como Xurxo Ayán, Jorge Mira, José Luis Rabuñal, José Lires Corbal, Ángel Carracedo, Fernando Lires Corbal, Antonio Muíños, José María Bello Diéguez, Cristina Pato e Xurxo Mariño dirixirán algunhas das actividades.

María Xosé Imia, patroa da Fundación Pondal explicou a filosofía de Titania, conciencia do noso pasado, un proxecto para educar poñendo en valor o patrimonio e a cultura, dende a perspectiva das ciencias, as artes e as letras. Todo ilo visto como un achegamento multidisciplinar ao entorno, neste caso en relación cun fenómeno económico e industrial, como foi a explotación durante más de dous de decenios do xacemento de Balarés

Os centros participantes son os CEIP As Forcadas e Eduardo Pondal; o IES de Ponteceso; os CPI As Revoltas e Cabo de Area; os CRA Os Remuiños e Nosa Señora do Faro, e as escolas unitarias de Mens, Barizo, Brantuas, Pazos, A Campara, Xornes, Tella e Ponteceso. Os responsables da maior parte deses centros estiveron presentes no acto de onte, que rematou cunha conferencia e cun percorrido polos restos da vella mina, da que tamén deu testemuña José Souto, extraballador que estivo presente na reunión.